Prezident Shavkat Mirziyoev jer esabın júrgiziw hám kadastr xızmetin rawajlandırıw boyınsha islengen jumıslar hám aldaǵı wazıypalarǵa baylanıslı prezentaciya menen tanıstı.

Mámleketimizde 45 million gektarǵa shamalas jer maydanı bar. 2021-jılǵa shekem sonnan tek ǵana 1 million gektarı mámleketlik dizimnen ótkerilgen edi. Keyingi jıllarda birden-bir sistema jaratılıp, sanlastırıw engizilgeni nátiyjesinde 42 million gektar jer, yaǵnıy jámi maydanlardıń 94 procenti dizimnen ótkerildi.
Sonıń ishinde, toǵay hám suw fondı, qorǵalatuǵın tábiyǵıy aymaqlar tolıq mámleketlik dizimge alındı. Transport, baylanıs, geodeziya, energetika, jol sıyaqlı 13 túrdegi mámleketlik kadastr boyınsha maǵlıwmatlar 100 procent qáliplestirildi. Jáne 7 baǵdar boyınsha jumıslar juwmaqlawnıw basqıshında.
Tarawdaǵı eń áhmiyetli másele – kóshpes múlk qatnasıqların tártipke salıw bolıp esaplanadı. Usı maqsette kóshpes múlklerdiń haqıyqıylıǵı hám isenimliligi mámleket tárepinen kepillengen birden-bir maǵlıwmatlar bazası – UZKAD sisteması iske túsirilgen. Barlıq imarat hám obektler xatlawdan ótkerilip, oǵan kirgizilmekte. Házirgi waqıtqa shekem 150 mıń turaq jay hám 707 mıń turaq jay emes obekt, 44 mıń kóp qabatlı jay haqqındaǵı maǵlıwmatlar usı jańa sistemada sáwlelendirilgen.
Jaqın waqıtqa shekem óz úyine múlk huqıqı bolmaǵanı ushın millionlaǵan puqaralar qıynalıp kiyatırǵan edi. Ózbekstan Respublikasınıń 2024-jıl 5-avgusttaǵı «Ózbasımshalıq penen iyelep alınǵan jer uchastkalarına hám olarda qurılǵan imaratlar menen obektlerge bolǵan huqıqlardı tán alıw haqqında»ǵı nızamı menen usı jıldıń yanvar ayınan hújjetlerdi rásmiylestirip, iyelerine beriw baslandı.
Prezentaciyada aldaǵı rejeler hám tiykarǵı wazıypalar kórip shıǵıldı.
Atap ótilgenindey, bıyıl 400 mıń jeke tártiptegi turaq jay UZKAD sistemasına kirgiziledi. Nátiyjede múlkti satıw, ijaraǵa beriw, miyras qaldırıw, girewge qoyıw sıyaqlı processler jeńilletiledi. Keleshekte 6 million 300 mıńnan aslam barlıq jeke tártiptegi turaq jaylar usı sistemada sáwlelendiriledi.
Kóp jerlerde kóshpes múlktiń kadastr bahası menen haqıyqıy bazar bahası arasında úlken ayırmashılıq bar. Bul huqıqıy qatnasıqlarda hám sawdalarda teńsizlikti keltirip shıǵarıp atır.
Sonıń ushın Ózbekstan Prezidentiniń 5-marttaǵı pármanına muwapıq, kóshpes múlkti ǵalabalıq bahalaw sisteması engizilmekte. Bunıń ushın Kadastr agentliginde Kóshpes múlkti ǵalabalıq bahalaw milliy orayı ashıldı. Oǵan 40 milliard sum ajıratılıp, maman qánigeler tartılıp, ámeliy jumıslar baslap jiberildi.
Ǵalabalıq bahalaw bıyıl Tashkent qalasında baslanıp, keyingi jıllarda Nókis qalası hám wálayatlar oraylarında jáne qalǵan aymaqlarda basqıshpa-basqısh ámelge asırıladı.
Mámleketimiz basshısı kadastr maǵlıwmatları ekonomikalıq rejelerdi nátiyjeli belgilew ushın áhmiyetli tiykar ekenin atap ótip, bul tarawda bir pútinlik hám anıqlıqtı támiyinlew boyınsha kórsetpeler berdi. Byurokratiyanı keskin azaytıp, kadastr xızmetleriniń sapasın arttırıw, isbilermenlerge jeńillikler jaratıw wazıypası qoyıldı.

ÓzA