Intellektuallıq múlk mámlekettiń rawajlanıwın támiyinleytuǵın áhmiyetli faktorlardan.

Sonıń ushın elimizde intellektuallıq múlkti qorǵaw sistemasın ápiwayılastırıw, sonıń ishinde, talapnama beriwshilerdi intellektuallıq múlk obektlerin mámleketlik dizimnen ótkeriw procesinde payda bolatuǵın artıqsha byurokratiyalıq tosqınlıqlardan awlaq etiw maqsetinde bir qatar jumıslar ámelge asırılmaqta. Bul baǵdardaǵı jumıslardıń nátiyjesi sıpatında, 2024-jılı oylap tabıwlar sanı 2020-jılǵa qaraǵanda 10 procentke, paydalı model 160 procentke artqan. Dizimnen ótken intellektuallıq múlk obektleri 2024-jıl jaǵdayına 21 mıń 985ti qurap, 46 procentke kóbeygen.
Bul sanlar Oliy Majlis Nızamshılıq palatasınıń búgingi májilisinde ádillik ministriniń orınbasarı Muzraf Ikromov tárepinen aytıp ótildi. Májiliste intellektuallıq múlk obektlerin dizimnen ótkeriw tártiplerin ápiwayılastırıwǵa qaratılǵan nızam joybarı birinshi oqıwda kórip shıǵıldı.
Ministrdiń orınbasarı atap ótkenindey, bul joybar intellektuallıq múlk obektlerin jaratıw kólemin arttırıw hám avtorlardı qollap-quwatlawǵa qaratılǵan. Nızam joybarı menen sanaat múlki obektlerin dizimnen ótkeriw processlerinde talap etiletuǵın mámleketlik bajı tólengenin tastıyıqlawshı hújjetlerdi beriwdi biykarlaw belgilenbekte.
Ámeldegi nızamshılıqqa bola, elektron esaplaw mashinaları ushın baǵdarlamalardı hám maǵlıwmatlar bazaların rásmiy dizimnen ótkeriw ushın ámelge asırılatuǵın tekseriw múddeti anıq belgilenbegen. Nızam joybarında bolsa elektron esaplaw mashinaları ushın baǵdarlamalardı hám maǵlıwmatlar bazaların rásmiy dizimnen ótkeriw ushın berilgen talapnama hám oǵan qosımsha etilgen hújjetlerdiń belgilengen talaplarǵa muwapıqlıǵın tekseriw múddetin 10 kún etip belgilew názerde tutılmaqta.
Atap ótilgenindey, nızam joybarınıń qabıl etiliwi nızamshılıqtaǵı intellektuallıq múlk obektlerin mámleketlik dizimnen ótkeriw tártip-qaǵıydalarınıń ápiwayılastırılıwına, artıqsha talaplardıń saplastırılıwına hám intellektuallıq múlk iyelerin qollap-quwatlawǵa xızmet etedi.

Muhtarama Komilova, ÓzA