Amerikalı isbilermen, “Neuralink” neyrotexnologiya kompaniyasınıń iyesi Ilon Masktiń pikirinshe, jaqın bes jıl ishinde shıpaker xirurglardıń ornın robot-xirurglar iyelewi múmkin.

– Robotlar sheber xirurgtan bir neshe jıl, eń zorlarınan bolsa shama menen bes jılda ozıp ketedi, – dep túsinik bergen milliarder sociallıq tarmaq arqalı. – Sonday-aq, “Neuralink” miy toqımasına elektrod kirgize aladı. Bul wazıypanı orınlaw ushın insanda ya tezlik, ya anıqlıq jetpeydi.
Yanvar ayınıń basında Mask birinshi márte adamǵa “Neuralink” miy implantı qoyılǵanı hám onıń jaǵdayı jaqsı ekenin málim etken edi. Qurılmanıń jumısı nátiyjesinde alınǵan dáslepki maǵlıwmat perspektivadan dárek bergen.
Keyin ala isbilermen “Telepatiya” atlı jańa qurılma iyesi pikir kúshinen paydalanǵan halda smartfon yamasa kompyuterdi basqara alatuǵının atap ótti. Bunday mexanizm birinshi gezekte ayaq-qolların háreketlendiriw qábiletinen ayırılǵan adamlar ushın qolaylı.

Qaraqalpaqstan xabar agentligi