Kashmirdiń Hindstan qadaǵalawındaǵı aymaǵında 26 turisttiń ólimine sebep bolǵan hújimnen soń Hindstan Pakistan menen tiykarǵı shegaradan ótiw ornın japtı. Qońsı mámleket diplomatların shıǵarıp jiberdi hám suw bólistiriwi boyınsha kelisim orınlanıwın toqtattı. Bul haqqında VVS jazdı.

Ayıplawǵa qaramastan, Pakistan waqıyaǵı baylanıslı ekenin biykarladı. Hindstan tárepinen kórilgen ilajlarǵa juwap beriw máselesin dodalaw ushın búgin milliy qáwipsizlik májilisin ótkeredi.
Toǵaydan shıǵıp kelgen qurallı adamlar iri turistlik mánzil – Pahalgam qalasınıń janında miymanlarǵa avtomattan oq atqan. Qaytıs bolǵanlar haqqında tolıq maqlıwmat toplanǵan. Qurbanlar arasında pal ayın ótkeriw maqsetinde kelgenler, isbilermenler dizimge alınǵan.
Ayawsız hújimdi kim ámelge asırǵanı boyınsha elege shekem rásmiy tastıyıqlaw joq. Ayırım baspasóz xabarlarında Pakistanda jaylasqan «Lashkar-e-Tayba» shólkemine baylanıslı topar juwapkershilikti moynına alǵanı aytılǵan.
Hindstan Bas ministri Narendra Modi qáwipsizlik ushın juwapkerler menen ushırasıw ushın sırt el saparın qısqarttı hám Delige qayttı. Ol ayıplanıwshılar ayap otırılmaytuǵının atap ótti.
Hindstan hám Pakistan dawagerlik etip atırǵan Kashmir kóp jıllar dawamında kóterilis orayı bolıp kelmekte. Tartıs nátiyjesinde házirge shekem on mıńlaǵan gúnasız adam erte ómirden kóz jumdı. Ara-arasında qurallı basqınshılar turistlerge de hújim shólkemlestirip turadı.

Musulmon Ziyo, ÓzA