Bıyıl 21-apreldegi «2025-jıl ushın menshiklestiriw baǵdarlaması haqqında»ǵı PP-70-sanlı párman menen 2025-jılı menshiklestiriwdiń tiykarǵı maqsetli kórsetkishleri belgilendi.

Sonıń ishinde, tómendegiler:
– 30 trillion sumlıq mámleketlik aktivler hám jer uchastkaların satıw hám keminde 10 trillion sum túsimdi támiyinlew;
– mámleket hám mámleket qatnasıwındaǵı kárxanalarǵa tiyisli 115 jámiyet ustav kapitalındaǵı úleslerdi, 659 kóshpes múlk obektin hám 6,1 mıń gektar jer uchastkaların sawdaǵa shıǵarıw;
– dáslepki basqıshta keminde 30 paydalı qazılma kán hám uchastkalarınan paydalanıw huqıqın sawdaǵa shıǵarıw.
Sonday-aq, 2030-jıl 1-yanvarǵa shekem mámleket qatnasıwındaǵı kárxanalardı shólkemlestiriwge moratoriy engiziledi.
Maydanı 10 mıń metr kvadratqa shekemgi mámleketlik múlk obektleri joqarı texnologiyalı ónim islep shıǵaratuǵın isbilermenlerge 5 jıl múddetke tikkeley biypul paydalanıwǵa beriledi hám shártnama shártleri orınlanǵan jaǵdayda usı isbilermenlerge bahalanǵan bahada tikkeley satıladı.
Baslanǵısh bahanı basqıshpa-basqısh tómenletiw mexanizmi qollanǵannan keyin de 1 jıldan artıq múddette satılmaǵan hám qarıydarlar ushın tartımlı bolmaǵan kóshpes múlk obektleri basqa yuridikalıq táreplerdiń ustav kapitalına úles sıpatında kirgiziledi.
Bazarlar hám sawda kompleksleri ustav kapitalında jergilikli mámleketlik hákimiyat uyımlarınıń májbúriy qatnasıwı haqqındaǵı talap biykar etiledi.

Qaraqalpaqstan xabar agentligi