22-aprelde qabıl etilgen Húkimettiń 252-sanlı qararı menen «Sırt elge jumısqa tayarlaw orayı» shólkemlestiriledi hám onda «Bir ayna» principi tiykarında miynet migraciyasına baylanıslı xızmetler kórsetiledi.

Sonday-aq, jolawshı avtobuslardıń sanın kóbeytiw arqalı sırt elde waqtınsha miynet etiwin ámelge asırıw ushın kiyatırǵan hám qaytıp atırǵan puqaralardı tasıwda arzan hám tártipli transport qatnawı jolǵa qoyıladı.
Qarar menen «Sırt elde miynet etiwdi ámelge asırıw ushın ketip atırǵan hám miynet migraciyasında bolǵan puqaralarǵa subsidiya, kompensaciya hám kreditler ajıratıw tártibi haqqında»ǵı Reje tastıyıqlandı.
Rejege bola, subsidiya hám kompensaciyalar miynet migraciyası elektron baǵdarlamalıq kompleksinde dizimnen ótken hám shólkemlestirilgen halda miynet migraciyasına ketip atırǵan puqaralarǵa tómendegi qárejetlerdi qaplaw boyınsha ajıratıladı, sonıń ishinde:
– shet tilleri hám (yamasa) kásip boyınsha mamanlıq imtixanların tapsırıw qárejetlerin qaplaw ushın, olar tabıslı tapsırılǵanda hám sertifikat alınǵanda – BEMniń 3 esesine shekem;
– sırt elde miynet etiwdi ámelge asırıwǵa «jumısshı viza»nı rásmiylestiriw qárejetlerin qaplaw ushın – BEMniń 5 esesine shekem;
– jol biletin satıp alıw menen baylanıslı qárejetlerdi qaplaw ushın – BEMniń 2 esesine shekem muǵdarda;
– nemis, inglis, yapon hám koreys tilleri boyınsha keminde B1 yamasa oǵan teńlestirilgen dárejedegi xalıqaralıq sertifikat alǵan pitkeriwshileri eń kóp bolǵan 50 ge shekem oqıtıwshıǵa – 50 million sum muǵdarında.
Waqtınsha miynet etiwdi ámelge asırıw ushın shólkemlestirilgen halda rawajlanǵan mámleketlerge shıǵıp atırǵan puqaralarǵa kommerciyalıq bankler tárepinen 10 million sumǵa shekem Oraylıq banktiń tiykarǵı stavkasınan 4 procent bántke joqarı stavkada 2 jıl múddette mikrokreditler ajıratıladı.

Qaraqalpaqstan xabar agentligi