Usı jıl 18-aprel kúni qabıl etilgen Prezidenttiń PP-67-sanlı pármanı menen 2025-jıl 1-oktyabrden Ózbekstan aymaǵına alıp kiriletuǵın aromatizator yamasa reń beriwshi qosımshalarsız aq qumshekerge akciz salıǵı biykar etiledi.

20 hám onnan aslam jumısshısı bar yuridikalıq táreplerge múlk hám jer salıqları hám ijara tólemleri boyınsha esaplanǵan salıq summaların 2025-jıl 15-iyulde hám 1-dekabrde bólip tóleniwine ruqsat beriledi.
Sonday-aq, ulıwma awqatlanıw xızmetlerin kórsetetuǵın isbilermenlerge tólengen QQSnıń bir bólegin qaytarıwda usı jumıstan alınǵan dáramat tólemlerdi (xızmetlerdi) realizaciyalawdan alınǵan ulıwma dáramattıń keminde 80 procenti qurawı zárúr ekenligi belgilendi.
Bunnan tısqarı, sanaat kárxanalarınıń avtomatikalıq monitoring stanciyası, shań-gaz tazalaw úskenesi, lokal suw tazalaw kompleksi hám stancionar baqlaw postı menen úskenelew minnetiniń múddeti tómendegishe sozıladı:
– I kategoriyadaǵı kárxanalar ushın – 2026-jıl 1-yanvarǵa shekem;
– II kategoriyadaǵı kárxanalar ushın – 2026-jıl 1-iyulge shekem.

Qaraqalpaqstan xabar agentligi