Qanlıkól rayonında grant qarjıları tiykarında jańa baǵ jaratılmaqta.

Birlesken Milletler Shólkemi Rawajlanıw baǵdarlamasınıń «Aralboyı regionındaǵı jámiyetlik birlespelerdiń jasıl, inklyuziv rawajlanıwına járdem beriw hám jergilikli xalıqtıń turaqlılıǵın arttırıw» joybarı tiykarında Qanlıkól rayonındaǵı Beskópir awıl puqaralar jıyını aymaǵındaǵı «Bisenov Sabur» diyqan xojalıǵı ushın grant qarjıları ajıratılǵan edi.
Usı tiykarda 10,2 mıń AQSh dolları muǵdarındaǵı qarjı qaratılıp, baǵshılıqtı rawajlandırıw joybarı ámelge asırılmaqta. Bul jerdegi 3 gektarlıq maydanǵa 2500 den artıq joqarı sortlı miyweli terek nálleri alıp kelinip egildi.
Diyqan xojalıǵı bunnan aldın da baǵshılıq penen shuǵıllanıp, jańa joybar ámelge asırılıwı nátiyjesinde baǵ maydanı keńeyip, jáne qosımsha joqarı dáramat alıwına tiykar jaratılǵanlıǵın atap ótiw orınlı.

Qaraqalpaqstan xabar agentligi