2025-jıl 18-aprel kúni Ózbekstan Respublikası Oliy Majlisi Senatınıń Baslıǵı Tanzila Narboeva basshılıǵındaǵı parlament delegaciyası Sankt-Peterburg qalasında ǴMDA PAnıń 1941-1945-jıllardaǵı Ekinshi jer júzilik urıstaǵı Jeńistiń 80 jıllıǵına baǵıshlanǵan saltanatlı májilisine qatnastı.

Ilajda ǴMDA qatnasıwshı mámleket parlamentleri hám xalıqaralıq shólkemler de qatnastı.
Saltanatlı májiliste Oliy Majlis Senatınıń baslıǵı Tanzila Narbaeva shıǵıp sóyledi.
Ózbekstan parlamenti joqarı palatasınıń basshısı ilaj qatnasıwshıların Ullı Jeńistiń 80 jıllıǵı menen shın júrekten qutlıqlap, bul sáne pútkil adamzat ushın ullı qádriyatlar – tınıshlıq, erk-ıqrar hám awızbirshilik nıshanı ekenin atap ótti.
Ullı Jeńis – fashizmge qarsı iyinles bolıp gúresken barlıq xalıqlardıń ulıwma jeńisi bolıp tabıladı. Urıs jıllarında Ózbekstan xalqınıń frontta da, front artında da kórsetken sheksiz erligi hám miyneti ayrıqsha atap ótildi.
1941-1945-jıllar dawamında elimizden derlik 2 million adam mobilizaciyalanǵanı, olardıń yarımınan kóbisi sawashlarda qaytıs bolǵanı, jaralanǵanı yamasa biydárek joǵalǵanı atap ótildi. Sonıń menen birge, Ózbekstan 1,5 millionnan zıyat evakuaciya etilgen adamlardı – kekseler, hayal-qızlar hám balalardı, sonıń ishinde 250 mıń jetim balanı qabıl etkeni, olarǵa baspana hám ǵamqorlıq kórsetkeni ayrıqsha atap ótildi.
Jeńiske alıp barǵan jol tek qural menen emes, al front artındaǵı miynet, keńpeyillik hám awızbirshilik sezimleri menen de támiyinlengen. Sol jıllarda Ózbekstanǵa 170 ten zıyat zavod hám fabrikalar evakuaciyalanıp, qısqa múddette áskeriy ónimler islep shıǵarıwǵa ótkerilgen.
Bunday tariyxıy sáne xalqlarımız arasındaǵı doslıq hám birge islesiw baylanısların bunnan bılay da bekkemlewge, jas áwladqa tınıshlıq hám keńpeyillik sabaǵı sıpatında xızmet etiwi zárúr ekenligi atap ótildi.