Aldın xabar berilgenindey, Moynaq rayonında ishimlik suwı támiynatı jaqsılanbaqta.

Ózbekstan Respublikası Prezidentiniń arnawlı qararına muwapıq, Aziya rawajlanıw bankiniń qatnasıwında “Ózbekstannıń batıs bóleginde ishimlik suwı támiynatı sistemaların rawajlandırıw” joybarınıń ámelge asırılıwı belgilengen.
Joybar bahası jámi 8,2 mln. AQSh dollarlıq qarjı ajıratılǵan bul obektte, búgingi kúnde “Archico” JShJ (Ázerbayjan) kompaniyası tárepinen rayondı taza ishimlik suwı menen támiyinlewdi jaqsılawǵa qaratılǵan qurılıs jumısları alıp barılmaqta.
Joybar sheńberinde 5 suw bólistiriw qurılması, 128,1 kilometrlik suw tarmaǵın qurıw hám rekonstrukciyalaw názerde tutılǵan. Házirgi waqıtta 25,2 kilometrlik suw tarmaqları tartılıp, qurılıs jumısları dawam etpekte.
Maǵlıwmat ushın, házirgi waqıtta Moynaq rayonınıń ishimlik suwı menen támiyinlengenlik dárejesi 72,7 procentti quraydı.

Qaraqalpaqstan xabar agentligi.