Ózbekstan Respublikası Prezidentiniń 2023-jıl 11-sentyabrdegi PQ-158-sanlı Pármanı menen tastıyıqlanǵan «Ózbekstan-2030» strategiyasında belgilengen baslı wazıypalardıń áhmiyetin miyirbiykeler arasında keńnen en jaydırıw, xalıq arasında húrmetke ılayıq hám óz kásibine pidayı bolǵan miyirbiykelerdi qollap-quwatlaw, medicina xızmetkerleriniń bilimin arttırıw hám olardıń arasında básekini támiyinlewdi shólkemlestiriw maqsetinde, Qaraqalpaqstan Respublikası boyınsha «Aǵla miyirbiyke-2025» tańlawınıń respublikalıq basqıshı bolıp ótti.

Tańlawǵa Nókis qalası hám rayonlıq medicina birlespelerinen 12 miyirbiyke qatnasıp, belgilengen shártler tiykarında ózleriniń bilim hám tájiriybelerin sınaqtan ótkerdi. Ótkerilgen tańlaw juwmaǵında Ámiwdárya rayonlıq medicina birlespesiniń miyirbiykesi Maftuna Marksova birinshi orındı iyelewge miyasar boldı.
Sıylı ekinshi hám úshinshi orınlar Shımbay rayonlıq medicina birlespesiniń miyirbiykesi Mehriban Ótebaeva hám Respublikalıq kóp tarmaqlı medicina orayınıń miyirbiykesi Yulduz Joldasbaevalarǵa nesip etti.
Tańlaw jeńimpazları Qaraqalpaqstan Respublikası Densawlıqtı saqlaw ministrligi hám Ózbekstan densawlıqtı saqlaw xızmetkerleri kásiplik awqamı Qaraqalpaqstan Respublikası keńesi tárepinen arnawlı diplom hám estelik sawǵalar menen sıylıqlandı. Sonday-aq, tańlawdıń barlıq qatnasıwshılarına Ózbekstan Miyribiykeler associaciyasi Qaraqalpaqstan bólimi tárepinen de estelik sawǵalar tapsırıldı.
Tańlaw jeńimpazı «Oliy hamshira-2025» tańlawınıń Ózbekstan Respublikası basqıshına jollamanı qolǵa kirgiziwge miyasar boldı.
-Tańlawda jeńimpaz bolǵanımnan oǵada quwanıshlıman. Nesip etse, tańlawdıń juwmaqlawshı basqıshında da jeńimpaz bolıwǵa háreket etemen, -deydi Ámiwdárya rayonlıq medicina birlespesiniń miyirbiykesi Maftuna Marksova.
Ilaj koncert baǵdarlaması menen kewilli dawam etti.

Adilbay Orazov,
Qaraqalpaqstan xabar agentligi sholıwshısı