Tájikstan Respublikası Bas ministri Kohir Rasulzoda basshılıǵındaǵı húkimet delegaciyası Xorezm wálayatına bardı.
Xiywa qalasında Ózbekstan Respublikası Bas ministri Abdulla Aripov hám Tájikstan Respublikası Bas ministri Kohir Rasulzoda basshılıǵında Ózbekstan hám Tájikstan arasındaǵı sawda-ekonomikalıq birge islesiw boyınsha húkimetleraralıq komissiyanıń gezektegi májilisi bolıp ótti.

Májiliste sońǵı jıllarda Ózbekstan – Tájikstan birge islesiwiniń jańa basqıshqa kóterilgeni, mámleketlerimiz arasındaǵı awqamlaslıq qatnasıqları ámeliy jaqtan bekkemlenip baratırǵanı, onda, ásirese, Ózbekstan Respublikası Prezidenti Shavkat Mirziyoev hám Tájikstan Respublikası Prezidenti Emomali Rahmon arasındaǵı isenimli qatnasıqlar hám olardıń siyasiy erk-ıqrarları úlken áhmiyetke iye ekenligi atap ótildi.
Májiliste tiykarǵı itibar sawda-ekonomikalıq, investiciyalıq, transport, energetika, sanaat, awıl xojalıǵı hám basqa tarawlarda birge islesiw qatnasıqların jáne de keńeytiwge qaratılǵan perspektivalı joybarlardıń orınlanıwı boyınsha ámelge asırılıp atırǵan jumıslarǵa qaratıldı.
Atap ótilgenindey, óz-ara tovar almasıw kólemi sońǵı bes jılda eke esege ósti. Birgeliktegi kárxanalardıń sanı úsh júzden arttı. Bul kórsetkish turaqlı túrde ósip barmaqta. Sonıń menen birge, tovar aylanısınıń kórsetkishi mámleketler potencialına tolıq sáykes kelmeydi hám ele paydalanılmaǵan imkaniyatlar bar.
Bunnan tısqarı, mámleketler basshıları húkimetlerdiń juwapkershiligine 2030-jılǵa shekem óz-ara sawda kólemin 2 milliard dollarǵa jetkeriw wazıypasın qoyǵan.
Májiliste onıń ushın sanaat kooperaciyasın jáne de tereńlestiriw, transport hám kommunikaciya tarawında birgeliktegi joybarlardı ámelge asırıw, suw resursları hám energetika tarawında óz-ara paydalı nátiyjeli birge islesiwdi dawam ettiriw, awıl xojalıǵı hám azıq-awqat qáwipsizligin támiyinlew baǵdarındaǵı jumıslardı izbe-iz dawam ettiriw, mámleketlerimiz aymaqları arasındaǵı birge islesiwdi jedel rawajlandırıwǵa ayrıqsha itibar qaratıw kerekligi bildirildi.
Juwmaǵında Ózbekstan Respublikası hám Tájikstan Respublikası arasındaǵı sawda-ekonomikalıq birge islesiw boyınsha húkimetleraralıq komissiyanıń on ekinshi májilisi protokolına qol qoyıldı.
Sonday-aq, eki mámlekettiń Bas ministrleri birgelikte Xiywadaǵı «Ishan qala» estelik kompleksine bardı. «Ashıq aspan astındaǵı muzey» dep atalatuǵın bul Oraylıq Aziyada tolıq saqlanıp qalǵan qala Tájikstan delegaciyasında úlken tásir qaldırdı.

Ahmadjon Shokirov, Alo Abdullaev (súwret), ÓzA