Prezident Shavkat Mirziyoev 14-aprel kúni «Sea Breeze Uzbekistan» xalıqaralıq turizm orayınıń master-rejesi prezentaciyası menen tanıstı.

Elimizdegi qolaylı investiciyalıq ortalıq sebepli barlıq tarawlarǵa aldıńǵı ideyalar kirip kelmekte, jańa kompleksler qurılmaqta. Atap aytqanda, turizmde keyingi jıllarda 2 mıńnan aslam jańa isbilermen jumıs basladı. Ótken jılı sırt elli turistlerdiń keliwi birinshi márte 10 millionnan astı. Tek ǵana Tashkent wálayatınıń Bostanlıq aymaǵında Ámirsay hám «Ugam River» sıyaqlı kurortlar, «Beldirsay-CHimyon-Nanay» turizm orınları shólkemlestirildi.
Bunday rawajlanıw páti sırt elli investorlardı da ózine tartpaqta. Sonıń ishinde, CHarvoq suw saqlaǵıshı boyında «Sea Breeze Uzbekistan» xalıqaralıq turizm orayı qurılısı haqqında aldın xabar berilgen edi. Bul prezentaciyada usı iri joybardıń bir neshe sırt el kompaniyalarınıń qatnasıwında islep shıǵılǵan master-rejesi kórip shıǵıldı.
Atap ótilgenindey, turizm orayın 10 kishi aymaqqa bólip qurıw názerde tutılmaqta. Olardıń hár biri piyada barıw múmkin bolǵan kewilashar orınlar hám xızmetlerdi qamtıp aladı. Eki jaǵalıq arasında kópir qurılıp, keliwshilerge qolaylılıqlar jaqsılanadı. Suw boyında qıyaban, plyaj hám dem alıw orınları bolsa, qıyalıqlarda miymanlar, kottedjler, jaylar, restoran hám tamasha orınları boladı. Sonday-aq, mádeniyat, bilimlendiriw, medicina, sport orınları qurıladı. Yaǵnıy bul jerde tek ǵana sayaxat dáwirinde emes, al jıl dawamında jasaw imkaniyatı da jaratıladı.
Mámleketimiz basshısı bul joybar barlıq keliwshilerge qolaylı bolıwı zárúr ekenin atap ótip, kompleksti zárúr infrastruktura menen támiyinlew boyınsha kórsetpeler berdi.

ÓzA