Paytaxtımızda awıl hayal-qızlarınıń ekonomikalıq jaǵdayın hám hayal-qızlar isbilermenligin rawajlandırıwǵa baǵıshlanǵan konferenciya bolıp ótti.

Ilaj dawamında Ózbekstannıń bir neshe aymaqlarınan mıńnan aslam hayal-qızlardıń qatnasıwında apa-sińlilerimizdiń ekonomikalıq jaǵdayın jaqsılaw hám awıllıq jerlerde hayal-qızlar isbilermenligin rawajlandırıwǵa baylanıslı joybarlaw nátiyjeleri usınıldı. Joybar Yaponiya húkimeti hám Jáhán banki járdeminde ámelge asırılmaqta.
Ánjumanda isbilermen hayal-qızlar, mámleketlik uyımlar, jámiyetlik shólkemler hám isbilermen hayal-qızlar shólkemleriniń wákilleri qatnastı.
Ilaj qatnasıwshılarına usı jıldıń iyul ayında juwmaqlanıwı rejelestirilgen «Awıllıq jerlerde hayal-qızlardıń ekonomikalıq jaǵdayların keńeytiw» joybarınıń nátiyjeleri usınıs etildi. Joybar 2021-jılı Yaponiya húkimeti hám Jáhán banki járdeminde baslanǵan. Atap aytqanda, Yaponiya sociallıq rawajlanıw qorı joybar ushın 2,7 million AQSh dollarınan artıq grant qarjıların usındı.
Ajıratılǵan qarjılar Ózbekstan Respublikası Shańaraq hám hayal-qızlar komitetine Ferǵana hám Jizzaq wálayatlarınıń 56 awıllıq punktlerinde hayal-qızlar isbilermenligin qollap-quwatlaw, apa-sińlilerimizdiń ekonomikalıq qatnasın kúsheytiwge baylanıslı ilajlardı ámelge asırıw imkaniyatın berdi.
Joybardıń maqsetli auditoriyası kem támiyinlengen shańaraqlardıń hayal-qızları, shańaraq baslıqları, mayıp hayal-qızlar, sonday-aq, mayıp balalardıń anaları boldı. Joybar sheńberinde 1000nan artıq hayal isbilermenlik kónlikpelerin rawajlandırıw boyınsha treninglerde qatnastı. Nátiyjede olar óz bizneslerin baslaw hám rawajlandırıw ushın zárúr másláhátler, salmaqlı muǵdardaǵı grantlar aldı.
Joybar qatnasıwshıları tigiwshilik, pal hárreshilik, sharwashılıq, qusshılıq, ulıwmalıq awqatlanıw xızmetleri, balalar baqshaların ashıw hám nan ónimleri, qumsheker, sabın, shulıq, qadaqlanǵan ishimlik suw islep shıǵarıw sıyaqlı tarawlarda óz biznesin jolǵa qoyıwı olarǵa awıllarda jańa jumıs orınların jaratıw, jergilikli xalıqtı talap etiletuǵın tovarlar hám xızmetler menen támiyinlew, shańaraqlardıń ekonomikalıq abadanlıǵın arttırıw imkaniyatın berdi.
Ilaj dawamında qatnasıwshılar Ózbekstanda hayal-qızlar isbilermenligin rawajlandırıw boyınsha keleshektegi ilajlardı dodaladı. Kredit resurslarınan paydalanıwdı ańsatlastırıw hám biznestiń belgili túrlerin iske qosıw ushın zárúr bilimler beriw máseleleri kóterildi.
Jáhán banki ekspertleri tıńlawshılarǵa biznesti baslaw hám rawajlandırıwǵa baylanıslı hayal-qızlar isbilermenligi hám hayal-qızlardıń óz-ara járdem toparların rawajlandırıw boyınsha xalıqaralıq tájiriybeni usındı. Atap aytqanda, dúnyadaǵı eń kóp isbilermen hayal-qızlarǵa iye mámleket bolǵan Hindstan mısalında hayal-qızlar isbilermenligi dodalandı.
Xalıqaralıq ánjumanda Ózbekstan Respublikası Bas ministriniń orınbasarı – Shańaraq hám hayal-qızlar komiteti baslıǵı Zulayho Mahkamova shıǵıp sóyledi.

Nazokat USMONOVA,
ÓzAnıń xabarshısı