2025-jıldıń úsh ayında ipoteka kreditleri ushın 4,4 trillion sum qaratıldı. Bul haqqında Oraylıq bank xabar berdi.

Oǵan bola, ajıratılǵan qarjılardıń 3 trillion sumı Ekonomika hám qarjı ministrligi hám 1,1 milliard sumı kommerciyalıq bankler tárepinen usınılǵan. Bunnan tısqarı, Ipotekanı qayta qarjılandırıw kompaniyası tárepinen de 310 milliard sumnan artıq qarjı qaratılǵan.
Usı jıldıń úsh ayı dawamında Ózbekstannıń 15 033 puqarası ipoteka kreditlerin alǵan bolıp, olardıń 63 procenti er adamlarǵa berildi. 75 procent jaǵdayda kredit alıwshılar qarjını jańa qurılǵan turaq jaylar ushın alǵan.
Ajıratılǵan kreditlerdiń 75 procenti baslanǵısh turaq jay bazarına, qalǵan 25 procenti bolsa ekilemshi bazardaǵı turaq jaylardı satıp alıw ushın jumsalǵan. Eń kóp ipoteka krediti Tashkent qalasında ajıratılǵan bolıp, 1 trillion 467,8 milliard sumdı quradı. Keyingi orınlardı 226,9 milliard sum menen Tashkent wálayatı hám 280,1 milliard sum menen Xorezm wálayatı iyeledi.
«Jańa tártip» sheńberinde ajıratılıp atırǵan kreditlerdiń procentlik stavkası 17,3 procentti quraydı.

Qaraqalpaqstan xabar agentligi