Usı kúnlerde Ózbekstan Respublikası investiciyalar, sanaat hám sawda ministri Laziz Qudratov basshılıǵındaǵı delegaciya AQShta bolıp tur.

Wákillerimiz sapar etiw dawamında taw-kán sanaatı, miymanxana biznesi, azıq-awqat sanaatı sıyaqlı áhmiyetli tarawlarda jumıs alıp baratuǵın iri kompaniya, korporaciya, sanaat birlespeleriniń basshıları menen ushırasıw hám sóylesiwler ótkermekte.

Kárxanalarǵa nátiyjeli investiciyalıq usınıslar, Ózbekstanda biznes alıp barıw ushın jaratılǵan sharayat haqqında hár tárepleme maǵlıwmat berilmekte. Olar elimizde ámelge asırılıp atırǵan reformalarǵa joqarı baha bermekte. Sonıń menen birge, elimizde kóp jıllıq tájiriybege iye Amerika kompaniyalarınıń nátiyjeli jumısınan kelip shıǵıp, birge islesiwdi rawajlandırıwǵa tayar ekenligin bildirmekte.

Házirge shekem tárepler paydalı qazılmalar tarawında birge islesiw boyınsha kelisimge qol qoydı. Sonday-aq, paydalı qazılma kánlerin izlew hám qazıp alıwǵa investiciya kirgiziw, joqarı dárejede maydalaw komplekslerin qurıw, innovaciyalıq texnologiyalardı tartıw, áhmiyetli shiyki zat ushın qosımsha qun jaratıw, ózbekstanlı qánigelerdiń mamanlıǵın arttırıw rejesi dúzip alındı. Turizm tarawında jańa joybarlar alǵa qoyılıp, miymanxanalardı qurıw múddetleri belgilendi.

Erisilgen kelisimler tiyisli hújjetler menen bekkemlendi. Hár bir baslama ushın juwapker menedjer tayınlandı.

G.Sattorova, ÓzA