Ózbekstan Respublikası Prezidenti Shavkat Mirziyoev 10-aprel kúni Ullı Britaniyanıń burınǵı Bas ministri, Globallıq ózgerisler institutınıń baslıǵı Toni Blerdi qabılladı.

Ózbekstannıń usı abıraylı struktura menen ámeliy birge islesiwin rawajlandırıw máseleleri kórip shıǵıldı.
Toni Bler Jańa Ózbekstandı qurıw boyınsha ámelge asırılıp atırǵan reformalardıń barısı hám kólemin joqarı bahaladı, olardı jáne de alǵa ilgeriletiw sheńberinde zárúr ekspert-másláhát járdemin kórsetiwge tayar ekenligin bildirdi.
Ekonomika tarmaqlarına iri strategiyalıq investorlardı tartıw, texnologiyalıq modernizaciya, sanlastırıw hám jasalma intellektti engiziwdi jedellestiriw, áhmiyetli tarawlarda birgeliktegi baǵdarlama hám joybarlardı ámelge asırıwǵa qaratılǵan ilajlar birge islesiwdiń basqa da tiykarǵı baǵdarları sıpatında atap ótildi.
Ullı Britaniyanıń burınǵı Bas ministri Toni Bler tárepinen 2016-jılı shólkemlestirilgen institut xalıqaralıq kommerciyalıq emes shólkem bolıp tabılatuǵının atap ótiw kerek. Ol hár qıylı mámleketlerge turaqlı hám innovaciyalıq rawajlanıwdıń jańa modellerin islep shıǵıwda, klimat ózgeriwi hám basqa da zamanagóy qáwip-qáterlerge qarsı gúresiwge járdemlesedi.

ÓzA