Sırt elli turistlerdiń sanın arttırıw máselesi kórip shıǵılıp, «VVS», «Euronews» sıyaqlı abıraylı platformalarda, jáne 20 dan aslam xalıqaralıq kórgizbelerde turizm keńnen úgit-násiyatlanıp atırǵanı atap ótildi.
Bul baǵdarda elshilerimizdiń qatnasıwında basqa mámleketlerde de úgit-násiyat jumısların jedellestiriw zárúrligi kórsetip ótildi.
Máselen, Qıtaydıń eń uzaq provinciyaları, Gonkongtan da turistler kele basladı. Yamasa Polshaǵa aviaqatnawlar jolǵa qoyılǵanı ushın bul mámleketten turistler 7 esege arttı, pútkil Shıǵıs Evropadan turist alıp keliw imkaniyatı payda boldı.
Franciyaǵa saparında 14 jańa zamanagóy «Airbus» samolyotın satıp alıw, jáne 5 danasın ijaraǵa alıwǵa kelisildi, «Boeing» kompaniyası menen 12 samolyot alıp keliw boyınsha sóylesiw baslandı.
Juwapker ministrlik hám uyımlarǵa bul imkaniyattan ónimli paydalanıp, qay jerge neshe reys qoyıw hám qansha turist alıp keliwdi házirden esap-sanaq etiw tapsırıldı.
Qaraqalpaqstan xabar agentligi