Jáhán densawlıqtı saqlaw shólkeminiń bas direktorı Tedros Adxanom Gebreyesus xalıqaralıq jámiyetshilikti eskertti. Onıń pikirinshe, jańa globallıq pandemiya júz beriwi múmkin. Sonday jaǵdayǵa tayar turıw kerek.

– Keyingi pandemiya jaǵday tınıshlanıwın kútpeydi, -degen ol. – 20 jıl yamasa onnan da kóbirek waqıt dawamında júz beriwi múmkin. Bálkim erteń júz berer… Keyingi COVID-19 pandemiyası rásmiy túrde 7 million adamnıń ólimine sebepshi boldı, biraq JDSSh haqıyqıy ólim jaǵdayın 20 million, dep esaplaydı. Qaytıs bolǵan insanlardan tısqarı jáhán ekonomikası 10 trillion dollardan kóp zıyan kórdi. Koronavirus uzaq eslew sıyaqlı kórinse de, jańa kesellik tarqalıwı qáwipine házirden tayarlıq kóriw kerek. Dúnya bólingen, qarama-qarsılıq húkim súrip atırǵan házirgi zamanda mámleketler birge islesiw hám ulıwma til tabıw ushın ele birlesiwi múmkin ekenligi haqqında anıq belgi kerek.
Shólkemniń veb-saytında járiyalanǵan 2024-jıldıń statistikasında keltiriliwinshe COVID-19 pandemiyası 2020-2021-jıllarǵa sáykes túrde 4,1 million hám 8,8 million adamnıń ólimine sebepshi bolǵan. Nátiyjede pútkil dúnya boylap ortasha ómir súriw qısqarǵan.

Qaraqalpaqstan xabar agentligi