Ózbekstan Respublikası Prezidenti Shavkat Mirziyoev 7-aprel kúni elimizde rásmiy sapar menen bolıp turǵan Vetnam Milliy Majlisiniń Baslıǵı CHan Txan Man basshılıǵındaǵı delegaciya menen ushırasıw ótkerdi.

Sóylesiw basında delegaciya basshısı Ózbekstan jetekshisine Vetnam Kommunistlik partiyasınıń Bas xatkeri To Lam, Prezidenti Luong Kuong hám Bas ministri Fam Min Tinniń sálemin jetkerdi.
Ózbekstan menen Vetnam arasındaǵı kóp tárepleme qatnasıqlardı, bárinen burın, sawda-ekonomikalıq hám investiciya tarawlarında bunnan bılay da rawajlandırıw máseleleri hár tárepleme kórip shıǵıldı.
Húkimetleraralıq hám uyımlararalıq sóylesiwlerdi sistemalastırıw zárúrligi atap ótildi. Bıyıl Xanoy qalasında Húkimetleraralıq komissiya májlisi hám biznes forumın nátiyjeli ótkeriw zárúrligi atap ótildi.
Jańa joybarlardı alǵa qoyıw ushın energetika, geologiya, neft-ximiya, elektronika, toqımashılıq, awıl xojalıǵı hám basqa da tarmaqlarda sanaat kooperaciyası boyınsha kompleksli baǵdarlama tayarlawǵa kelisip alındı.
Mádeniyat hám turizm tarawlarındaǵı almasıwlardı, sonıń ishinde, vizasız tártipti engiziw arqalı rawajlandırıwǵa ayrıqsha itibar qaratıldı.
Birgeliktegi baslamalardıń ámeliy orınlanıwın támiyinlew maqsetinde parlamentleraralıq sóylesiwdi jedellestiriwge kelisip alındı.

ÓzA