Mámleketimiz paytaxtı parlamentarizm dúnyasındaǵı eń áhmiyetli waqıya – Parlamentleraralıq awqamnıń (PA) 150-yubiley assambleyasına tayarlıq jumısları dawam etpekte.

Búgin Tashkentte parlamentleraralıq awqam Atqarıw komitetiniń shólkemlestiriw máseleleri boyınsha májilisi bolıp ótti. Májiliste Oliy Majlis Senatınıń Baslıǵı Tanzila Norboeva kiris sózi menen qatnastı.
Senat baslıǵı óziniń shıǵıp sóylegen sózinde PA basshılıǵına, atap aytqanda, Awqam Prezidenti Tuliya Ekson hám bas xatker Martin CHungong 150-yubiley Assambleyanı Ózbekstanda ótkeriwge kelisim bildirgeni ushın minnetdarshılıq bildirdi. Bul ilajdıń elimizde ótkeriliwi mámleketimizdegi demokratiyalıq reformalardıń xalıqaralıq dárejedegi húrmeti ekeni atap ótildi.
T.Norboeva óziniń shıǵıp sóylegen sózinde sociallıq ádillik, kámbaǵallıqtı saplastırıw hám ázzi qatlamlardı qorǵaw máseleleriniń áhmiyetli ekenligin atap ótip, bul baǵdarda parlamentler arasındaǵı birge islesiwdi kúsheytiw áhmiyetli ekenligine itibar qarattı.
Sonday-aq, Ózbekstan parlamentiniń PA jumısındaǵı qatnasıwı barǵan sayın jedellesip atırǵanı atap ótildi. Prezident Sh.Mirziyoevtiń «Turaqlı rawajlanıw maqsetlerine erisiwdi jedellestriwde parlamentlerdiń rolin kúsheytiw haqqında»ǵı BMSh Bas Assambleyasınıń rezolyuciyasın qabıl etiw haqqındaǵı baslaması PA tárepinen tolıq qollap-quwatlanǵanı atap ótildi:
– Milliy parlamentimiz, atap aytqanda, Senat dúnya kún tártibindegi tiykarǵı baǵdarlar boyınsha usı xalıqaralıq struktura menen bunnan bılay da nátiyjeli, konstruktivlik sóylesiwdi izbe-iz dawam ettiriwden mápdar ekenligin bildirmekshimen.
Sonıń menen birge, PA Atqarıw komitetiniń jumısı joqarı bahalanıp, onıń parlamentleraralıq birge islesiwdi bekkemlewdegi úlken áhmiyeti atap ótildi. PA menen óz-ara birge islesiw sheńberinde Buxara hám Tashkent qalalarında xalıqaralıq parlament forumları hám PA ǵa aǵza mámleketlerdiń parlamentlerihayal-qız basshılarınıń 14-sammiti tabıslı ótkerilgeni de atap ótildi.

Norgul ABDURAIMOVA, ÓzA