Ózbekstan Respublikası Prezidenti Shavkat Mirziyoev 3-aprel kúni Samarqand sammiti sheńberinde mámleketimizde sapar menen bolıp turǵan Evropa keńesi Prezidenti Antoniu Koshta hám Evropa komissiyası Prezidenti Ursula fon der Lyayen menen ushırasıw ótkerdi.

Ózbekstan menen Evropa Awqamı arasındaǵı kóp táreplemeli birge islesiwdi, bárinen burın, sawda-ekonomika hám investiciya tarawlarında jáne de rawajlandırıw hám bekkemlew máseleleri hár tárepleme kórip shıǵıldı.
Hár qıylı dárejelerdegi jedel sóylesiwler hám nátiyjeli almasıwlar, ámeliy birge islesiwdiń institucionallıq mexanizmleri sheńberinde nátiyjeli jumıslar alıp barılıp atırǵanı ayrıqsha qanaatlanıwshılıq penen atap ótildi. Keńeytilgen sheriklik hám birge islesiw haqqındaǵı kelisimge qol qoyılıwına tayarlanbaqta.
Ózbekstannıń Evropa Awqamı mámleketleri menen tovar almasıw kólemi artıp barmaqta. Evropanıń jetekshi kompaniyalarınıń qatnasıwındaǵı investiciya joybarlarınıń portfeli 30 milliard evrodan aslamdı quramaqta. Mámleketimiz Evropa tikleniw hám rawajlanıw bankiniń iri beneficiarı bolıp esaplanadı, Tashkent qalasında Evropa investiciya bankiniń regionallıq wákilxanası ashılmaqta.
EAnıń bas institutlarınıń basshıları Jańa Ózbekstandı qurıw boyınsha ámelge asırılıp atırǵan ekonomikalıq reformalar baǵdarlamasın, sonday-aq, Oraylıq Aziyada jaqsı qońsıshılıq, isenim hám sheriklikti bekkemlew baǵdarındaǵı siyasattı joqarı bahaladı hám isenimli qollap-quwatlaytuǵının bildirdi.
Sóylesiwlerde tiykarǵı itibar innovaciyalar, «jasıl» energetika, taw-kán tarmaǵı, awıl xojalıǵı, transport, logistika, sanlastırıw hám basqa baǵdarlarda birgeliktegi baǵdarlama hám kooperaciyalıq joybarlardı ámelge asırıwǵa qaratıldı.
Turizm, mádeniyat, ilim, bilimlendiriw hám densawlıqtı saqlaw tarawlarındaǵı jedel almasıwlardı dawam ettiriw áhmiyetli ekenligi atap ótildi.
Bolajaq «Oraylıq Aziya – Evropa Awqamı» formatındaǵı birinshi joqarı dárejedegi sammit kún tártibindegi máseleler hám Evropanıń «Global dárwaza» strategiyası sheńberinde eki regionnıń óz-ara baylanıslılıǵın kúsheytiw perspektivaları dodalandı.
Xalıqaralıq hám regionallıq siyasattıń áhmiyetli tárepleri, sonıń ishinde, Awǵanstannıń sociallıq-ekonomikalıq rawajlanıwına járdemlesiw máseleleri boyınsha da pikir alısıldı.

ÓzA