Usı jıl 2-aprel kúni Ájiniyaz atındaǵı Nókis mámleketlik pedagogikalıq institutı sport klubı tárepinen futbol boyınsha «Rektor kubogi» sport jarısına start berildi,-dep xabar bermekte instituttıń baspasóz xızmeti.

Maqset – student-jaslar arasında sporttı keńnen en jaydırıw, salamat turmıs tárizin úgit-násiyatlaw, sheber sportshı jaslardı anıqlaw hám olardıń bos waqıtların mazmunlı ótkeriw bolıp esaplanadı.
Ilajda institut rektorı Q.Qodirov shıǵıp sóylep, xalqımız, ásirese, jaslarımız arasında sporttıń ǵalabalıǵına erisiw mámleketlik siyasat dárejesine kóterilip, fizikalıq jaqtan jetik, salamat áwladtı tárbiyalaw baǵdarında nátiyjeli jumıslar ámelge asırılıp atırǵanlıǵın atap ótti.
Usı maqsette institutta jaqında ǵana paydalanıwǵa tapsırılǵan sport kompleksi hám úlken sport maydanı jaslar ushın jaqsı imkaniyatlar esigin ashpaqta.
Ilajda rektor jaslardı turaqlı túrde sport penen shuǵıllanıp, joqarı nátiyjelerge erisiwge shaqırdı hám olardı bárqulla qollap-quwatlaytuǵınlıǵın atap ótti.
Solay etip, instituttıń barlıq fakultetleriniń komandaları qatnasıwında futbol boyınsha «Rektor kubogi» sport jarısına start berildi.
Institutta jaslar arasındaǵı sport jarısları dawam etpekte.

Qaraqalpaqstan xabar agentligi.