Ózbekstan Respublikası Prezidenti Shavkat Mirziyoev 1-aprel kúni Qıtay Xalıq Respublikası Kommunistlik partiyası Oraylıq komiteti Xalıqaralıq baylanıslar bóliminiń baslıǵı Lyu Czyanchao basshılıǵındaǵı delegaciyanı qabılladı.

Joqarı mártebeli miyman mámleketimiz basshısına Qıtay Baslıǵı Si Czinpinniń sálemi hám jaqsı tileklerin jetkerdi.
Ushırasıwda joqarı dárejede erisilgen kelisimlerge muwapıq Ózbekstan menen Qıtay arasındaǵı kóp táreplemeli birge islesiw hám ámeliy sheriklikti jáne de keńeytiw máseleleri kórip shıǵıldı.
Keyingi jılları Ózbekstan-Qıtay doslıq hám barlıq sharayatlarda hár tárepleme strategiyalıq sheriklik qatnasıqlarında joqarı dárejege erisilgeni ayrıqsha qanaatlanıwshılıq penen atap ótildi.
Óz-ara tovar almasıw hám investiciyalar kólemi turaqlı artıp barmaqta, ekonomikanıń tiykarǵı tarmaqlarında jetekshi kompaniyalardıń qatnasıwındaǵı birgeliktegi joybarlar hám kárxanalar sanı kóbeymekte.
«Qıtay-Qırǵızstan-Ózbekstan» temir jolın qurıw joybarı boyınsha ámeliy jumıslar alıp barılmaqta.
Jedel aymaqlararalıq baylanıslar hám mádeniy-gumanitarlıq almasıw joqarı bahalandı. Usı jılı gezektegi Aymaqlar forumı hám Bilimlendiriw forumı bolıp ótedi.
Parlamentleraralıq hám partiyalararalıq birge islesiwdi, ásirese, kámbaǵallıqtı qısqartıw, korrupciyaǵa qarsı gúresiw, sanlastırıw hám sanaatlastırıwdı jedellestiriw sıyaqlı tarawlarda jáne de keńeytiw zárúr ekenligine ayrıqsha itibar qaratıldı.
Joqarı hám professional bilimlendiriw tarawında birge islesiwdi jáne de rawajlandırıw, sonıń ishinde, mámleketimizde Qıtaydıń jetekshi joqarı bilimlendiriw mákemeleriniń filialların ashıw áhmiyetli ekenligi atap ótildi.

ÓzA