Qádirli watanlaslar!

Bárinen burın, siz ázizlerdi, pútkil xalqımızdı ullı áyyyam – múbárek Ramazan hayıtı menen shın júrekten qızǵın qutlıqlap, barlıǵıńızǵa ózimniń joqarı húrmetim hám jaqsı tileklerimdi bildiremen.

Usı baxıtlı demlerde bıyılǵı Ramazan ayın hár tárepleme múnásip ótkerip, Iyd-al-Fitrdi el-xalqımız benen birge mine, usınday quwanıshlı toy-tamashada kútip alıp atırǵanımız ushın Jaratqanǵa sheksiz shúkirler aytamız.

Álbette, túpkilikli mánide adamgershilik ideyası jámlengen muqaddes islam dininiń iygilikli qádiriyatları házirgi kúnde Jańa Ózbekstanda ámelge asırılıp atırǵan reformalarǵa qanshelli uqsas hám únles ekeni Ramazan ayında jáne de anıq kórindi, desek, haqıyqattı aytqan bolamız.

Bul haqqında sóz bolǵanda, bárinen burın, ruwxıy pákleniw, sabır-qanaat, shúkirshilik, qayır-saqawat pazıyletleri ulıǵlanatuǵın bul aydı milliy dástúr hám qádiriyatlarımızǵa sáykes túrde, joqarı dárejede ótkeriw, elimiz musılmanları ibadat etiw ámellerin emin-erkin orınlawı ushın barlıq sharayatlar jaratılǵanın atap ótiw kerek.

Ásirese, bul múbárek aydıń «Ramazan-saqawat, awızbirshilik hám keńpeyillik ayı» degen ideya tiykarında ótkerilgeni jámiyetimizde tınıshlıq, doslıq, miyrim-shápáát hám saqawat ortalıǵın jáne de bekkemlewge xızmet etti.

Usı maqsette kem támiyinlengen, járdemge mútáj shańaraqlar, kekse, mayıp hám jalǵız insanlardıń halınan xabar alıw, kámbaǵal adamlardıń awırın jeńil etiw, úyler hám máhállelerdi abat etiw, úsh áwlad wákilleri qatnasıwında ǵalabalıq terek egiw, jańa baǵlar jaratıw boyınsha kóplegen qayırqomlıq ilajlarınıń ótkerilgenin atap ótiw zárúr. Sonıń ishinde, respublikamız boylap kóp milletli, kóp konfessiyalı mámleketimiz jámiyetshiligi wákillerin birlestirgen iftarlıq máresimleri biziń kúshimiz birlikte hám tilekleslikte ekenin jáne bir márte anıq kórsetti.

Keyingi jılları jaqsı dástúrge aylanǵan bunday máresimler insan qádirin ulıǵlaw, miynetkesh hám ullı xalqımızdı tatıw, bir shańaraq sıpatında birlestiriw baǵdarında teńsiz áhmiyetke iye bolıp, biz bul jumıslardı bunnan bılay da sózsiz dawam ettiremiz, dep oylayman.

Húrmetli doslar!

Hámmeńizge belgili, islam – bárinen burın, adamgershilik, ilim, bilim hám aǵartıwshılıq, jaqsı pazıyletlerdi ulıǵlaw táliymatı.

Bul baǵdarda mámleketimizde islam civilizaciyası hám mádeniyatı tiykarında jaratılǵan bay ilimiy-ruwxıy miyrastı toplaw, úyreniw hám keń túrde úgit-násiyatlawǵa sońǵı jılları úlken itibar berilmekte. Mine, usı maqsette elimizde jańadan-jańa ilimiy-aǵartıwshılıq orayları, diniy baǵdardaǵı bilimlendiriw dárgayları, qutlı zıyarat orınları qurılıp, nátiyjeli jumıs alıp barmaqta.

Sózsiz, bulardıń barlıǵı gózzal úlkemizde barlıq taraw hám tarmaqlar qatarında diniy-aǵartıwshılıq turmıs ta úzliksiz rawajlanıwda ekeninen derek beredi. Bul jumıslarda elimizdiń musılmanları, pútkil xalqımızdıń múnásip úlesi bar ekenligin atap ótip, onıń ushın hámmeńizge shın kewilden minnetdarshılıq bildiremen.

Mine, usı kóterińki áyyyamda sırt ellerde ana watanǵa sadıqlıq tuyǵısı menen jasap atırǵan watanlaslarımızdı da Ramazan hayıtı menen shın kewilden qutlıqlap, olarǵa jaqsı tileklerimizdi bildiremiz.

Bul sharapatlı kúnde dúnyanıń alıs-jaqın úlkelerindegi musılman úmmetin de qızǵın qutlıqlap, olardıń xalıqları hám mámleketlerine doslıq sálemimizdi jollaymız.

Áziz hám qádirli watanlaslar!

Siz, ázizlerdi Ramazan hayıtı menen jáne bir márte shın kewlimnen qutlıqlap, bársheńizge bekkem densawlıq, baxıt ıǵbal, shańaraqlarıńızǵa qut-bereket tileymen.

Ramazan ayında islegen barlıq jaqsı niyet hám tileklerimiz qabıl bolsın!

Alla taala janajan Watanımız hám xalqımızdı ózi saqlasın!

Iyd-al-Fitr áyyyamı hámmemizge múbárek bolsın!

 

Shavkat Mirziyoev,

Ózbekstan Respublikası Prezidenti