Prezident Shavkat Mirziyoev 27-mart kúni qábiletli jaslardı qollap-quwtalaw sistemasın jetilistiriwge baylanıslı prezentaciya menen tanıstı.

Mámleketimiz tárepinen jaslardıń intellektuallıq potencialın arttırıw, olardı xoshametlew boyınsha keń imkaniyatlar jaratılmaqta. Sonıń ishinde, 14 Prezident mektebi, 185 qánigelestirilgen hám 9 dóretiwshilik mektebi shólkemlestirildi. Olardaǵı oqıtıw hám bahalaw sisteması 1 mıń 500 ulıwma bilim beriw mektebinde de engizildi. Qábiletli pitkeriwshiler ushın «Jańa Ózbekstan» universiteti ashıldı.
Bular – jaslarımızdıń dúnya dárejesinde bilim alıwına tiykar jaratadı. Endi olardı durıs baǵdarlap, dúnyadaǵı eń aldıńǵı universitetlerde oqıwına járdemlesiw zárúr.
Ótken ayda jaslar menen ushırasıwda Prezidentimiz bul baǵdarda bir qatar baslamalardı alǵa qoyǵan edi. Prezentaciyada bunıń ámeliy hám shólkemlestiriw tárepleri kórip shıǵıldı.
Atap aytqanda, usı maqsette bıyılǵı jıl sentyabrden xalıqaralıq mekteptiń jumısın jolǵa qoyıw rejelestirilmekte. Buǵan dáslep 8-klass pitkeriwshileri arasınan eń qábiletli 60 ul-qız tańlap alınadı. Bilimlendiriw baǵdarlaması xalıqaralıq standart tiykarında 3 bólimnen – tiykarǵı pánler, qánigelik pánleri, jetekshilik hám jámiyetlik belsendilikti úyretetuǵın pánlerden ibarat boladı. Oqıw jılı 3 dáwirge bólinip, 11 ay dawam etedi.
Prezidentimizdiń jáne bir baslamasına muwapıq, jaslarımızdı Amerikanıń «Pechak ligası» (The Ivy League) universitetlerine tayarlaw jolǵa qoyıladı. Bul ushın 6 basqıshlı Milliy baǵdarlama qabıl etiledi. Bıyıl dáslep 3 mıń oqıwshı saylap alınadı. Olarǵa Prezident hám qánigelesken mekteplerden 208 másláhátshi biriktiriledi.
Oqıwshılar Renessans dem alıw orınlarında jıl dawamında 3 háptelik intensiv oqıw kuslarında oqıtıladı. Jaqsı nátiyje kórsetken 40 oqıwshı «Pechak ligası» universitetlerine tájiriybe almasıw ushın jiberiledi.
Keyingi áhmiyetli másele – sırt elde oqıǵan jaslardı watanımızda óz tarawı boyınsha múnásip jumıs penen támiyinlew. Bul baǵdarda «Mámlekettiń altın fondı jámiyetshiligi»n dúziw usınıs etilmekte. Ol arqalı qábiletli jaslar birden-bir platformada birlestiriledi. Sırt elde bilim alıp qaytqanlar ushın jeńillikler, grantlar, startap baǵdarlamaları hám basqa da imkaniyatlar jaratıladı. Hár jılı 25-mayda jámiyetshiliktiń sezdi ótkerilip, onda bilimlendiriw reformaları qábiletli jaslar ushın jaratılǵan imkaniyatlar, sırt el joqarı oqıw orınlarınıń tájiriybesi sıyaqlı temalarda sóylesiw jolǵa qoyıladı.
Mámleketimiz basshısı bul usınıslardı maqullap, qábiletli jaslardı qollap-quwatlawdı sistemalı jolǵa qoyıw zárúrligin atap ótti.
Búgingi kúnde «El-yurt umidi» qorı arqalı 750 watanlasımız sırt elde oqıp atır. Juwapkerlerge jaslarımız ushın bul imkaniyatlardı bunnan bılay da arttırıw, qordıń jumısın jetilistiriw boyınsha kórsetpeler berdi.

ÓzA