Mámleketimizde Aralboyı regionınıń ekologiyalıq jaǵdayın turaqlastırıw, regionnıń sociallıq-ekonomikalıq rawajlanıwın jedellestiriw hám xalıqtıń turmıs tárizin jaqsılawǵa qaratılǵan keń kólemli reformalar ámelge asırılmaqta.

Bul jumıslardı izbe-iz dawam ettiriw maqsetinde Oliy Majlis Nızamshılıq palatasındaǵı Ózbekstan Ekologiyalıq partiyası frakciyası hám Ekologiya hám qorshaǵan ortalıqtı qorǵaw máseleleri komiteti tárepinen Moynaq rayonında “Aral – Parlament názerinde” atamasında ekologiyalıq akciya ótkerildi.
Onda Oliy Majlis Nızamshılıq palatasınıń, Joqarǵı Keńes hám jergilikli Keńestiń deputatları, Ekologiya, qorshaǵan ortalıqtı qorǵaw hám klimat ózgeriwi ministrligi, Toǵay xojalıǵı agentligi hám Moynaq rayonı hákimliginiń wákilleri qatnastı.
Akciyada Aral teńiziniń qurıǵan ultanında “jasıl qaplamalar” qorǵanıw toǵaylıqların jaratıw maqsetinde Oliy Majlis Nızamshılıq palatasındaǵı Ózbekstan Ekologiyalıq partiyası frakciyası hám Ekologiya hám qorshaǵan ortalıqtı qorǵaw máseleleri komiteti tárepinen 100 qalta qandim, qarabaraq, cherkez hám seksewil tuqımları jetkerildi hám egiw ilajları shólkemlestirildi.

Á.Jiyemuratov,
Qaraqalpaqstan xabar agentligi