Mámleketimiz basshısına avtomobil jolların qurıw joybarlarınıń barısı haqqında málimleme berildi.

Mámleketimizde ulıwma 184 mıń kilometrden aslam avtomobil jolı bar. Tallawlarǵa bola, xalıqaralıq áhmiyetke iye jollarımızdıń 25 procenti úlken júklemede islemekte. Máselen, kúnine 32 mıń avtomobilge mólsherlengen “Tashkent – Samarqand” jolında 45 mıń transport qatnamaqta. Tıǵılıs sebepli bir waqıtları oǵan 6 saatqa shekem waqıt ketpekte. 2030-jılǵa barıp háreket jedelligi 80 mıńnan artıwı múmkin.
Ózbekstan Prezidentiniń 2023-jıl 10-oktyabrdegi qararında zamanagóy avtomobil jolların shólkemlestiriw perspektivaları belgilengen edi. Bunnan gózlengen tiykarǵı maqset, birinshi gezekte, xalıqqa qolaylıqlar jaratıw, milliy ekonomikada logistika shınjırların bekkemlew bolıp esaplanadı.
Usı qararǵa muwapıq, Tashkentten Samarqandqa hám Ándijanǵa aparatuǵın alternativ jollar qurıw ústinde jumıs alıp barılmaqta. Sonıń ishinde, Jáhán banki qatnasıwında “Tashkent – Ándijan” jolı joybarlastırıldı. Yanvarda onı qurıw boyınsha xalıqaralıq tender járiyalandı. Qısqa waqıtta oǵan 30 dan aslam abıraylı sırt el kompaniyaları qızıǵıwshılıq bildirdi.
Ulıwma uzınlıǵı 314 kilometr bolǵan tezjúrer magistral paydalanıwǵa tapsırılıwı nátiyjesinde Tashkent penen Ándijan arasındaǵı qatnaw waqtı 5 saattan 3 saatqa shekem qısqaradı. Sonday-aq, bul jalpı ishki ónimdi 2,6 procentke arttırıp, avto avariyalardı 40 procentke azaytıw imkaniyatın beredi.
Jáne bir joybar Tashkent penen Samarqandtı baylanıstıratuǵın qosımsha jol qurıwǵa qaratılǵan. Sırt el qánigeleriniń qatnasıwında onıń texnikalıq-ekonomikalıq tiykarları islep shıǵılǵan. Bul jańa joldıń uzınlıǵı 300 kilometr átirapında boladı. Onıń nátiyjesinde Tashkent penen Samarqand arasında qatnaw waqtı 4,5 saattan 2,5 saatqa shekem qısqaradı. Házirgi bar jolda tıǵılıs bir talay azayadı.
Ulıwma, bul jańa jollar barlıq zamanagóy talaplarǵa juwap beretuǵın, alternativ hám qolaylı boladı. Olarda aydawshı hám jolawshılar ushın túrli tólemli xızmetler jolǵa qoyıladı. Qurılıs procesinde jergilikli qurılıs kárxanaları da qatnasıwı múmkin boladı.
Transport ministri usı joybarlar jaǵdayı boyınsha prezentaciya ótkerdi. Geodeziya jumısların jedellestirip, jolardıń aymaǵın tayarlaw, qurılısqa qarjı hám jumıstı bólip alıp islewshilerdi tartıw máseleleri kórip shıǵıldı.

ÓzA