Usı jıl 24-mart kúni qol qoyılǵan Prezidenttiń PP-56-sanlı pármanı menen shıǵındılardı qayta islew tarawındaǵı tiykarǵı baǵdarlar belgilendi.

Atap aytqanda:
– qattı turmıslıq shıǵındı poligonların 2030-jılǵa shekem 50 procentke qısqartıw;
-jańadan payda bolıp atırǵan shıǵındılardı poligonlarǵa jibermesten, maksimal dárejede qayta islew yamasa kúydiriw, tarawǵa cirkulyar ekonomika ámeliyatın engiziw.
2026-jıldan baslap shıǵındı poligonları Ekologiya, qorshaǵan ortalıqtı qorǵaw hám klimat ózgeriwi ministrliginiń usınısına muwapıq Ministrler Kabinetiniń qararına tiykarlanıp shólkemlestiriledi.
Sonday-aq, Shıǵındılardı basqarıw hám cirkulyar ekonomikanı rawajlandırıw agentligi sistemasında shıǵındı poligonları aymaǵında shıǵındılardı utilizaciyalaw hám qayta islewge qánigelesken sanaat zonaları (keyingi orınlarda – ekosanaat zonaları) 30 jıl múddetke shólkemlestiriledi.
Bunnan tısqarı, Namangan hám Tashkent wálayatlarında qattı turmıslıq shıǵındılardı termikalıq usılda utilizaciyalaw (jaǵıw) boyınsha investiciyalıq joybarlardı ámelge asırıw maqsetinde awıl xojalıǵına mólsherlengen suwǵarılatuǵın 19,87 gektar jer uchastkaları awıl xojalıǵına mólsherlengen jerler kategoriyasınan sanaat, transport, baylanıs, qorǵanıw hám basqa da maqsetlerge mólsherlengen jerler kategoriyasına ótkeriledi-dep málimleme beredi xabar.uz saytı.

Qaraqalpaqstan xabar agentligi