Házirgi waqıtta Nókis rayonı hákimi Z.Zaytovtıń basshılıǵındaǵı delegaciya aǵzaları Qıtay Xalıq Respublikası Sinczyan-Uyǵur avtonom rayonı Aksu okruginde xızmet saparında bolıp tur.

Xızmet saparınıń dáslepki kúninde rayon hákimi Z.Zaytov Aqsu rayonı gubernatorı Adil Aylı menen birge islesiw boyınsha óz-ara sóylesiwler ótkerdi. Ushırasıw dawamında eki aymaq arasında sociallıq-ekonomikalıq birge islesiwdi kúsheytiw, sawda baylanısların rawajlandırıw hám awıl xojalıǵı tarawında birgeliktegi joybarlardı ámelge asırıw máseleleri dodalandı.
Sonday-aq, Aksu okrugi gubernatorınıń orınbasarı Abladjan Toxtınıń qatnasıwında forum shólkemlestirildi. Forum dawamında V2V formatında ushırasıwlar ótkerilip, Nókis rayonı hám Aqsu okrugi arasında sociallıq-ekonomikalıq baylanıslardı bekkemlew, mádeniyat, bilimlendiriw, medicina hám awıl xojalıǵı baǵdarlarında birge islesiw haqqında memorandumǵa qol qoyıldı.
Forumnan soń, delegaciya aǵzaları Aksu okruginiń dıqqatqa ılayıq orınlarınan biri – Kwk Ya muzeyi hám Kanon Onsu esteliklerine bardı. Keyingi kúnlerde mádeniyat, bilimlendiriw, medicina, óndiris hám awıl xojalıǵı tarawlarında alıp barılıp atırǵan jumıslar menen tanısıw rejelestirilgen. Sonday-aq, eki aymaq arasında turizmdi rawajlandırıw hám investiciyalardı tartıw baǵdarında birge islesiwdi jolǵa qoyıw máseleleri de dodalanadı.
Bul xızmet saparı Nókis rayonı hám Aksu okrugi arasındaǵı qatnasıqlardı jańa basqıshqa alıp shıǵıwı kútilmekte.

Azizbek Dabılov,
Qaraqalpaqstan xabar agentligi sholıwshısı.