Ózbekstan Respublikası Prezidentiniń 2025-jıl 14-fevraldaǵı PQ-61-sanlı «Joqarı oqıw orınları pitkeriwshileriniń jumısqa ornalasıwına kómeklesiw boyınsha qosımsha ilajlar haqqında»ǵı qararı tiykarında, Berdaq atındaǵı Qaraqalpaq mámleketlik universitetinde «Keleshekke qádem orayı» óz jumısın basladı.

-Bul oraydı shólkemlestiriwden tiykarǵı maqset, universitet studentleri hám pitkeriwshileriniń jumıs penen támiyinleniwi ushın jańa imkaniyatlar jaratıw, olardıń kásiplik kónlikpelerin rawajlandırıwǵa járdemlesiw bolıp tabıladı,-deydi universitettiń oqıw isleri boyınsha prorektorı Alımjan Dúysenbaev.-Endigiden bılay, oraydıń shólkemlestiriwi menen studentler hám pitkeriwshilerimiz hár qıylı tarawlarda ámeliy tájiriybe arttırıw, jumıs beriwshiler menen tikkeley baylanıslar ornatıw imkaniyatına iye boladı.
Bunnan tısqarı, oray óz biznes ideyaların ámelge asırıw niyetinde bolǵan universitettiń pitkeriwshi kurs studentleri ushın biznes ideyanı tayar joybarǵa shekem alıp barıw procesinde tolıq járdemlesiw, sonıń ishinde, qolaylı shártlerde qarjılandırıw, universitettiń pitkeriwshi hám tómengi kurs studentleri arasında tarawlar boyınsha ashıq tańlawlar ótkeriw hám jeńimpazlardı jumıs penen támiyinlewge járdem beriledi.
Álbette, Prezidentimizdiń qararı tiykarında shólkemlestirilip, óz jumısın baslap atırǵan bul oray tek ǵana jaslardıń jumısqa jaylasıwın ańsatlastırıp qoymastan, al, universitette ekonomikalıq ósiw hám sociallıq turaqlılıqtı támiyinlewge de úlken úles qosadı, dep oylaymız.

Adilbay Orazov,
Qaraqalpaqstan xabar agentligi sholıwshısı.