Ózbekstan Respublikası Prezidenti

Ullı Mártebeli Mırza Shavkat Mirziyoevqa

Húrmetli Prezident Mırza!

Qıtay kalendarı boyınsha Jańa jıl bayramı múnásibeti menen jollaǵan qutlıqlawıńız ushın Sizge shın júrekten minnetdarshılıǵımdı bildiremen.
Ózbek xalqınıń dástúriy Nawrız bayramı múnásibeti menen Qıtay húkimeti hám xalqı atınan Sizge, Ózbekstan húkimeti hám xalqına qızǵın qutlıqlawlarımızdı jetkermekshimen.
Mıń jıllıq tariyxqa iye Nawrız báhár keliwi hám tábiyattıń oyanıwın sáwlelendirip, ózbek xalqınıń baxıtlı turmısqa, el-jurt birligi hám rawajlanıwına umtılısın sáwlelendiredi.
Ótken jılı iyul ayında Astanada bolıp ótken ShBSh sammiti sheńberindegi qızǵın hám doslıq ruwxındaǵı ushırasıwımızda Qıtay-Ózbekstan qatnasıqları hám hár qıylı tarawlardaǵı birge islesiwdi bunnan bılay da rawajlandırıw boyınsha áhmiyetli kelisimlerge eristik, eki tárepleme baylanıslardıń jańa baǵdarların belgilep aldıq.
Erisilgen kelisimlerimiz nátiyjeli ámelge asırılıp atırǵanı, eki mámleket arasındaǵı óz-ara paydalı birge islesiw izbe-iz bekkemlenip, itibarǵa ılayıq nátiyjeler berip atırǵanın qanaatlanıwshılıq penen atap ótemen.
Men Qıtay-Ózbekstan qatnasıqların rawajlandırıwǵa úlken áhmiyet beremen hám jaqın doslıǵımızdı joqarı qádirleymen.
Siz benen birgelikte barlıq tarawlardaǵı birge islesiwdi alǵa qoyıw, Qıtay hám Ózbekstannıń birden-bir táǵdir jámiyetshiligin qurıw jumısların bayıtıw ushın háreket etiwge tayarman.
Pursattan paydalanıp, Siz, Ullı mártebeli Mırzaǵa bekkem densawlıq, shańaraqlıq baxıt-ıǵbal, mámleket basshısı sıpatındaǵı juwapkershilikli jumısıńızda tabıslar, dos Ózbekstan xalqına bolsa tınıshlıq-tatıwlıq, turaqlı rawajlanıw hám abadanlıq tileymen.

Húrmet penen,

Si Czinpin,
Qıtay Xalıq Respublikasi Baslıǵı