Qazaqstan Respublikasınıń Shımkent qalasında háwesker kinorejissyorlar arasında «Kinoart-2025» xalıqaralıq festivalı bolıp ótti.

Qazaqstannan tısqarı, Ózbekstan hám Qırǵız Respublikalarınan talantlı kinorejisyorlar tárepinen túsirilgen jańa kino filmler qatnasqan festivalda Qaraqalpaqstan Respublikası teleradiokanalı mámleketlik mákemesiniń telerejissyorı Qoblan Ábdiqaliev ta scenariy avtorı Aybek Tóreev bolǵan «Galstuk» atlı qısqa metrajlı filmi menen qatnasıp, sıylı ІІІ-orındı iyelewge miyasar boldı.
Bul jas rejissyordiń ekinshi filmi bolıp, bunnan aldın óziniń «Tufli» atlı qısqa metrajlı filmi menen usı festivalǵa qatnasqan edi. Álbette, ótken jılı Ózbekstan mámleketlik kórkem óner hám mádeniyat institutı Nókis filialın oqıp tamamlaǵan Qoblan Ábdiqaliev ushın bul úlken jetiskenlik desek boladı.
– 17 minutlıq filmimizde tiykarınan búgingi kúndegi elimizdegi jas shańaraqlardıń turmısı sáwlelengen,-deydi tańlaw jeńimpazı Qoblan Ábdiqaliev.-Bul filmde jas aktyorlarımızdan Ruslan Qayıpnazarov, Aziza Bazarbaeva, Rinat Jumanov hám Vladimir Paraxatovlar súwretke tústi hám ózlerine tapsırılǵan rollerdi sheberlik penen atqarıp shıqtı. Pursattan paydalanıp, meniń usınday jetiskenlikke erisiwime sebepshi bolǵan ustazımız Aybek Tóreev hám aktyor jigit-qızlarımızǵa ózimniń ayrıqsha raxmetimdi aytaman. Aldaǵı waqıtları da, usı pátti jazdırmastan xalqımız ushın jańa filmler dóretip, elimizdiń atın pútkil dúnyaǵa tanıtıw ushın ózimniń bar bilimim hám kúsh-jigerimdi jumsay beremen.
Óz gezeginde jas rejissyorımızdı qolǵa kirgizgen tabısı menen qutlıqlap, onıń aldaǵı dóretiwshilik islerine bálent párwazalar tileymiz.

Adilbay Orazov,
Qaraqalpaqstan xabar agentligi sholıwshısı