Ózbekstan Respublikası Prezidenti Shavkat Mirziyoev 19-mart kúni Túrkmen xalqınıń milliy jetekshisi, Túrkmenstan Xalıq Másláháti Baslıǵı Gurbanguli Berdimuhamedov penen telefon arqalı sóylesti. Eki tárepleme qatnasıqlar hám regionallıq birge islesiwdiń áhmiyetli máseleleri kórip shıǵıldı.

Sóylesiw aldınan mámleket basshıları jaqınlasıp kiyatırǵan báhár áyyyamı – Nawrız múnásibeti menen bir-birin qızǵın qutlıqlap, bekkem densawlıq, abadanlıq hám tabıslar, dos Ózbekstan hám Túrkmenstan xalıqlarına tınıshlıq hám rawajlanıw tiledi.
Doslıq, isenim, jaqsı qońsıshılıq hám strategiyalıq sheriklik principlerine tiykarlanǵan kóp táreplemeli Ózbekstan-Túrkmenstan qatnasıqları jedel rawajlanıp atırǵanı úlken qanaatlanıwshılıq penen atap ótildi.
2024-jılı óz-ara tovar almasıw kólemi 1 milliard dollardan arttı. Sanaat, energetika, transport, awıl hám suw xojalıǵı, ekonomikanıń basqa da tarmaqlarında óz-ara paydalı birge islesiw rawajlanbaqta hám kooperaciya tereńlespekte. Birgelikte “Shavat – Tashawız” shegaraaldı sawda zonası shólkemlestirilmekte, jedel aymaqlararalıq baylanıslar hám mádeniy-gumanitarlıq almasıw baǵdarlaması sheńberinde ilajlar ótkerilmekte.
Ózbekstan hám Túrkmenstan jetekshileri regionallıq sheriklik, áhmiyetli forum hám ánjumanlarǵa tayarlıq kóriw hám olardı ótkeriw máselelerine ayrıqsha toqtap ótti.
Samarqand qalasında “Oraylıq Aziya plyus” formatında ótkeriletuǵın sammitler hám Tashkent qalasında region mámleketleri basshılarınıń gezektegi Másláhát ushırasıwınıń kún tártibi boyınsha hár tárepleme pikir alıstı.
Mámleketimiz basshısı usı jıldıń dekabr ayında Ashxabad qalasında Túrkmenstannıń baslaması menen Birlesken Milletler Shólkemi Bas Assambleyası tárepinen járiyalanǵan Xalıqaralıq tınıshlıq hám isenim jılı sheńberinde ótkeriletuǵın forum hám basqa da xalıqaralıq ilajlar úlken áhmiyetke iye ekenin ayrıqsha atap ótti.

ÓzA