Shomanay rayonında Prezidentimiz tárepinen belgilep berilgen jańa sistema tiykarında “Xalıqtıń qıytaq jer hám ijara jerlerinen nátiyjeli paydalanıw arqalı dáramatların arttırıw ilajları” atamasında kórgizbeli seminar ótkerildi.

Ilajǵa “Ózbekstan milliy elektr tarmaqları” AJ basqarma baslıǵı D.Isaqulov, Shomanay rayonı hákimi A.Ametov, hákim orınbasarları, mákeme hám kárxana baslıqları, tiyisli qánigeler hám rayondaǵı isbilermenler qatnastı.
Dáslep, miymanlar rayon hákimligi imaratınıń aldında shólkemlestirilgen isbilermenler tárepinen tayarlanǵan kórgizbelerdi kózden ótkerdi. Sonday-aq, awıl xojalıǵında xızmet kórsetiw ushın lizingke alınǵan traktorlar hám jeńilletilgen kreditler tiykarında alınǵan multikultivatorlar isbilermenlerge tapsırıldı.
Bunnan soń, seminar qatnasıwshıları shańaraqlıq isbilermenligin jolǵa qoyǵan M.Rejepovanıń gózzallıq salonına barıp, búgingi kúndegi jumıs procesi menen tanıstı. Isbilermen 6 qızdı jumıs penen bánt etip, xalıqqa sapalı xızmet kórsetpekte.
Seminar dawamında keyingi mánzil Mádeniyat mákan puqaralar jıyını aymaǵındaǵı isbilermen R.Allaniyazovtıń awıl xojalıǵı ónimlerin qayta islew arqalı sharwa malları ushın ot-jem ónimlerin islep shıǵarıwshı kárxana bolıp, isbilermenniń búgingi kúndegi jumısları menen tanıstı.
Soń qatnasıwshılar Nawrız mákan puqaralar jıyını aymaǵındaǵı “Dárbent” kóshesindegi bir neshe shańaraqlardıń úy aldı qıytaq jerine qurılǵan ıssıxanaları hám ıqsham parniklerde nál hám palız eginlerin egiwdi álle qashan baslap jibergen kóshe turǵınlarınıń báhárgi egis jumısları menen tanıstı. Sonday-aq, seminar qatnasıwshıları usı kóshede zamarrıq egiwdi jolǵa qoyıp, shańaraǵına qosımsha dáramat kirgizip atırǵan A.Bekimbetov penen sáwbetlesip, óz-ara pikir alıstı.
Keyingi mánzil Mamıy awıl puqaralar jıyını boldı. Bul jerde “Jasıl mákan” ulıwma milliy joybarı sheńberinde “Jaslar baǵı” shólkemlestirildi. Rayon hákimi hám seminar qatnasıwshıları jaslar menen birigip, baǵ ishinde sayamanlı hám miyweli terek nállerin egip, qorshaǵan ortalıqtıń kóklemzarlastırılıwına óz úleslerin qostı.
Seminar sońında Begjap awıl puqaralar jıyını aymaǵındaǵı “Ran Omad” juwapkershiligi sheklengen jámiyeti tárepinen 2 gektar maydanda shólkemlestirilgen ıssıxanadaǵı jumıslar barıp kórildi.
Seminar dawamında qatnasıwshılar qıytaq jer mádeniyatın keńeytiw arqalı jańa texnologiyalar járdeminde eginlerdi egiw hám olardan dáramat alıw boyınsha kóplegen bilim hám tájiriybege iye bolıp, ózlerin qızıqtırǵan sorawlarǵa juwap aldı.

Qaraqalpaqstan xabar agentligi.