Ózbekstan Sawda-sanaat palatası baslıǵı Davron Vahobov Prezidenttiń ekonomikalıq rawajlanıw, nátiyjeli basqarıw hám xalıqaralıq birge islesiw máseleleri boyınsha másláhátshisi Suma CHakrabarti menen ushırasıw ótkerdi.

Ilajda CHakrabarti xızmeti xalıqaralıq ekspertleri Jonatan CHarlz hám Mari-Enn Bikren de qatnastı.
Tárepler elimizge investiciya tartıw, jergilikli hám sırt el investorları ushın qolaylı biznes ortalıǵın jaratıw máselelerin dodaladı. Jańa biznes joybarların qollap-quwatlaw, xalıqaralıq qarjı institutları menen sheriklikti bekkemlew, mámleketimizdiń investiciyalıq tartımlılıǵın arttırıwǵa qaratılǵan anıq strategiya islep shıǵıw zárúr ekenligine ayrıqsha itibar qaratıldı.
Ónimlerimizdi jańa bazarlarǵa shıǵarıw, kárxanalardı qollap-quwatlaw, logistika infrastrukturasın jetilistiriw hám eksport procesin ápiwayılastırıw mexanizmin jetilistiriw teması da kóterildi.
Ushırasıwda Tashkent xalıqaralıq kommerciya sudı (TXKS) jumısına da ayrıqsha itibar qaratıldı. Bul struktura sırt el kompaniyaları menen kommerciyalıq kelispewshiliklerdi sheshiw, xalıqaralıq shártnamalar hám konvenciyalardı ámeliyatqa engiziw maqsetinde shólkemlestirilgen.
Sóylesiw juwmaǵında investiciya tartıw, eksport kólemin arttırıw hám TXKS jumısın rawajlandırıw ushın birge islesiwdi bekkemlew boyınsha kelisimge erisildi.

M.Pirmatova, ÓzA