Ózbekstan Respublikası Prezidenti Shavkkat Mirziyoev 18-mart kúni elimizde ámeliy sapar menen bolıp turǵan Evropa Awqamınıń Xalıqaralıq birge islesiw boyınsha komissarı Yozef Sikela basshılıǵındaǵı delegaciyanı qabıl etti.

Ózbekstan menen Evropa awqamı arasındaǵı kóp tárepleme qatnasıqlardı bunnan bılay da rawajlandırıwdıń áhmiyetli máseleleri dodalandı.
Sóylesiw basında Evropa Awqamınıń joqarı dárejeli wákili mámleketimiz basshısına Evropa komissiyası prezidenti Ursula fon der Lyayen hám Evropa keńesi baslıǵı Antoniu Koshtanıń sálemin hám jaqsı tileklerin jetkerdi.
Keyingi jıllarda eki tárepleme birge islesiw, sonıń ishinde, siyasiy, sawda-ekonomikalıq, investiciyalıq hám mádeniy-gumanitarlıq tarawlarda jedel rawajlanıp atırǵanı úlken qanaatlanıwshılıq penen atap ótildi.
Onı basqıshpa-bashqısh keńeytiw ushın úlken imkaniyat hám poetncial bar ekenligi atap ótildi.
Ózbekstan hám EA arasında Keńeytilgen sheriklik hám birge islesiw haqqındaǵı jańa kelisimge tez waqıtta qol qoyılıwı da buǵan xızmet etedi.
Transport hám logistika, energetika, sanlastırıw, awıl hám suw xojalıǵı, basqa da áhmiyetli baǵdarlarda birliktegi joybarlar hám baǵdarlamalardı alǵa qoyıwdan eki tárep te mápdar ekeni atap ótildi.
Oǵada áhmiyetli mineral resurslardı qayta islew tarawında óz-ara paydalı ámeliy birge islesiwdi jolǵa qoyıwǵa ayrıqsha itibar qaratıldı.
Ushırasıwda usı jıl aprel ayınıń basında Samarqand qalasında «Oraylıq Aziya – EA» birinshi sammiti hám Klimat forumın shólkemlestiriw hám ótkeriw máselesi kórip shıǵıldı.
Oraylıq Aziyada regionallıq birge islesiw máseleleri boyınsha da pikir alısıldı.

ÓzA