Ózbekstan Respublikası Prezidentiniń “Ózbekstan Respublikası puqaraların múddetli áskeriy xızmetke gezektegi shaqırıw hám belgilengen xızmet múddetin ótep bolǵan múddetli áskeriy xızmetkerlerdi Qurallı Kúshler rezervine bosatıw haqqında”ǵı qararına tiykarlanıp, shaqırıw múddetin keshiktiriw hám shaqırıwdan azat etiliw huqıqına iye bolmaǵan Ózbekstan Respublikasınıń shaqırıw jasındaǵı puqaraları usı jıldıń mart-aprel aylarında múddetli áskeriy xızmetke shaqırılmaqta.

Múddetli áskeriy xızmetti ótew ushın Nókis qalasına temir jol transportı menen jetip kelgen jigitlerdi Arqa-Batıs áskeriy okrugi áskerleri sárkardalıǵı, Qurallı Kúshler veteranları, keń jámiyetshilik wákilleri “Nókis” temir jol vokzalında kútip aldı.
Usı múnásibet penen áskeriy bólimde ótkerilgen ilajda okrug áskerleri sárkardası polkovnik Rahmatullo Rahmonov shıǵıp sóylep, Watan aldındaǵı muqaddes hám maqtanıshlı wazıypasın atqarıw ushın kelgen elimizdiń márt ullarına iyilmes erk-ıqrar hám mártlik tiledi.
Qaraqalpaqstan jerine jetip kelgen azamatlardı qutlıqlap, bul eldiń bay tariyxıy miyrası, mádeniyatı hám úrp-ádetleri bir jıl dawamında múddetli áskeriy xızmetti ótep atırǵan áskerlerde úlken tásir qaldıratuǵınına isenim bildirdi. Watanımızdı kózdiń qarashıǵınday qásterlep saqlap, jarqın júz benen úylerine qaytıwın tiledi.
Atap ótilgenindey, elimizdiń hár qıylı wálayatlarınan saylap alınǵan mine, usınday márt hám záberdes jigitler orınlarda saltanatlı kútip alınbaqta. Sebebi, watandı qorǵawday juwapkershilikli wazıypanı atqarıwǵa kirisip atırǵan jigitler xalqımız, mámleketimiz tárepinen joqarı qádirlenedi.
Nókis garnizonı áskeriy orkestriniń atqarıwındaǵı jaǵımlı namalar astında kútip alınǵan jańa áskeriy xızmetkerlerde saltanatlı kútip alıw máresimi ózgeshe keypiyat hám kúsh-ǵayrat baǵıshladı.
Áskeriy bólimge jetip kelgen elimizdiń márt ulları bólimlerge bólinip, olar menen bir aylıq jıyın shınıǵıwı ótkeriliwi belgilengen. Jıyınǵa biriktirilgen tájiriybeli oficer hám serjantlar endi ǵana armiya turmısına kirip kiyatırǵan shaqırılıwshılarǵa áskeriy turmıs tárizine tez hám ańsat beyimlesiwi ushın járdem beredi.

Qaraqalpaqstan xabar agentligi