Pútkil dúnya, sonıń ishinde Evropa regionındaǵı áhmiyetli waqıya-hádiyselerdi tolıq sholıp baratuǵın belgili basılım – «European Politics Review» jurnalı mámleketimiz basshısınıń Franciyaǵa mámleketlik saparı haqqında arnawlı maqala járiyaladı.

Materialda Shavkat Mirziyoev hám Еmmanuel Makron Elisey sarayında sóylesiw ótkergeni, mámleket basshıları tar sheńberde hám delegaciyalar qatnasıwında kóp táreplemeli óz-ara baylanıslardı jáne de rawajlandırıw máselelerin tolıq dodalaǵanına itibar qaratılǵan:
– Ótken jılı eki mámlekettiń sawda aylanısı birinshi márte 1 milliard evrodan astı, birgeliktegi kárxanalardıń sanı tórt esege kóbeydi. Orano, EDF, Total, SUEZ, Voltalia, Veolia sıyaqlı iri kompaniyalar Ózbekstanda tabıslı jumıs alıp barmaqta. Franciya rawajlanıw agentligi menen birge islesiw jedel basqıshqa kirgen, jańa birge islesiw baǵdarlaması qabıl etilgen.
Avtor Franciyanıń hár qıylı qalalarında ótkerilip atırǵan birgeliktegi ilajlar, sonday-aq, bul sapar aldında shólkemlestirilgen medicinalıq forum, ilim hám bilimlendiriw boyınsha konferenciya, Ózbekstannıń turizm imkaniyatı hám mádeniyatı prezentaciyasına ayrıqsha itibar qaratqan.
Regionlararalıq birge islesiwdi rawajlandırıw maqsetinde kelesi jılı Samarqandta Ózbekstan hám Franciya regionlar forumın ótkeriw boyınsha kelisimge erisilgeni hám Prezidentler atap ótken basqa da áhmiyetli máseleler dodalanǵan.
«European Politics Review» basılımı mıńlaǵan dereklerden alınǵan jańalıqlardı beriw ushın aldıńǵı intellektuallıq sistemalardan paydalanatuǵının atap ótiw kerek. Global tarmaq quramındaǵı redakciya dúnya málimleme mákanınan múnásip orın iyelegen.

Behruz Xudoyberdiev,
ÓzAnıń xabarshısı