Nókis mámleketlik texnika universitetinde milletler aralıq doslıq hám tatıwlıqtı bekkemlew, jaslar arasında ana-Tábiyatqa degen súysipenshilikti kúsheytiw hám olardıń ekologiyalıq bilimlerin arttırıw maqsetinde, «Ássalam Báhár!» atamasında saz-sáwbetli, ruwxıy-aǵartıwshılıq ilaj bolıp ótti.

Kesheniń ashılıw máresiminde universitettiń telekommunikaciya tiykarları hám kásiplik tálim fakultetiniń dekanı Bayram Fayzullaev, ózbek tili hám shet tilleri kafedrasınıń baslıǵı Húrziya Jaqsımovalar qatnasıwshılardı elimizge kirip kelgen báhár máwsimi, jańalanıw hám jasarıw bayramı Nawrız benen qızǵın qutlıqlap, mámleketimizde húkim súrip turǵan tınıshlıqtıń qádirine jetip, xalıqlar arasındaǵı óz-ara doslıq hám tatıwlıqtı bekkemlew, ana-tábiyatımızdı kóz qarashıǵınday saqlawǵa shaqırdı.
Bunnan soń ilajda studentler tárepinen tayarlanǵan hár qıylı koncert baǵdarlamaları, saxnalıq kórinis hám viktorinalarǵa náwbet berilip, bul ilaj qatnasıwshılarında umıtılmas tásirler qaldırdı.

Adilbay Orazov,
Qaraqalpaqstan xabar agentligi sholıwshısı.