13-14-mart kúnleri Samarqand wálayatında ótkerilgen «Siz ekologiyaǵa tiyisli nızamlardı bilesiz be?» tańlawınıń juwmaqlawshı basqıshı bolıp ótti.

Tańlawǵa mámleketimizdiń barlıq aymaqlarınan usı tańlawdıń aymaqlıq basqıshında jeńimpaz bolǵan komandalar, sonıń ishinde respublikamız atınan Nókis qalasındaǵı 33-sanlı ulıwma orta bilim beriw mektebiniń oqıwshıları qatnastı.
Qızıqlı ótken tańlaw shártleriniń juwmaǵında Tashkent qalasınıń «Tabiat himoyachilari» komandası birinshi, Xorazm wálayatınıń «Yosh ekologlar» komandası ekinshi hám Qaraqalpaqstan Respublikasınıń «Tábiyat dosları» komandası úshinshi orındı iyelewge miyasar boldı.
-Mektebimiz oqıwshılarınıń bul tabısı barlıq pedagogikalıq jámáátimizdi quwanıshqa bóledi,-deydi 33-sanlı ulıwma orta bilim beriw mektebiniń direktorı Saltanat Iniyatova.- Tańlaw oqıwshılardıń ekologiyaǵa degen qızıǵıwshılıǵın arttırıp, olardıń talantların júzege shıǵarıwına keń imkaniyat jarattı. Aldaǵı waqıtları bunnan da joqarı jetiskenliklerge erise beredi, dep xalqımızdı isendiremiz.

Adilbay Orazov,
Qaraqalpaqstan xabar agentligi sholıwshısı