Arqa-Batıs áskeriy okrugine qaraslı Nókis garnizonındaǵı áskeriy bólimlerdiń birinde azamatlıq minnetin ótep, rezervke bosatılǵan 600 den aslam múddetli áskeriy xızmetkerler saltanatlı túrde úylerine shıǵarıp salındı.

Bir jıl dawamında qıyınshılıqtı kórip, mashaqat hám sınaqlarda pisken elimizdiń márt ulları úylerine jarqın júz benen qaytıwı aldında, olar menen áskeriy okrug áskerleri sárkardası polkovnik R.Raxmonov ushırasıp, sáwbetlesti.
Nókis garnizonındaǵı Ruwxıylıq hám aǵartıwshılıq orayınıń májilisler zalında qızǵın sáwbetlesiw tárizinde bolıp ótken ushırasıwda sárkarda bir jıl múddet ishinde ruwxıy hám fizikalıq jaqtan shınıqqan jaslarǵa keleshegi ushın kerek bolatuǵın aqıl-násiyatların berip, Watan qorǵawshısı bolıw sıyaqlı juwapkershilikli wazıypa hámmege de nesip ete bermeytuǵının atap ótti.
Atap ótilgenindey, ázelden shańaraqta ul perzent dúnyaǵa kelse, saqshı, qorǵawshı, ásker tuwıldı dep ózgeshe quwanadı. Búgin de ul perzentke shańaraq tayanıshı, áwlad keleshegi, el qorǵawshısı sıpatında qaraladı, keleshekke jaqsı niyetler menen qaraydı. Ul bala erjetkende, ata-ana onıń úlken ómirge dáslepki qádemin áskeriy mektepten baslawın árman etedi.
Mine, bir jıl da ótip ketti. Ótken jılı múddetli áskeriy xızmetke shaqırılǵan óspirimler búgin ata-analarınıń diydarına er jigit bolıp, úylerine jarqın júz benen qaytpaqta. Bir jıl úlken múddet bolmasa da, qısqa pursat jigitlerdi ádewir shınıqtırdı, erkin bolıwǵa iytermeledi. Olardıń dúnyaqarasın keńeytti, jámáát bolıp jasawǵa, doslıq baylanısların saqlawǵa, Watanǵa xızmet etiwge, ata-ananı qádirlewge úyretti. Awa, armiya bul turmıs mektebi. Ol insandı ruwxıy hám fizikalıq jaqtan shınıqtıradı, úlken ómirge tayarlaydı.
“Ómir mektebi”nde shınıqqan jaslar menen sárkardanıń sáwbetlesiwi qızǵın ruwxta, erkin pikirlesiw hám kóterińki keypiyatta bolıp ótti. Áskeriy turmıs jolı bay tájiriybeden ibarat bolǵan sárkardanıń shıǵıp sóylegen sózi ibrat mektebin ótken jaslar ushın keleshekte jetik insan bolıp mámleketimizdiń rawajlanıwına óz úlesin qosıwǵa shaqırdı. Kásip-óner úyreniwge, qaysı tarawda bolmasın, óz isiniń sheber ustası dárejesine shekem kóteriliwge ruwxlandırdı. Elimiz abadanlıǵı, keleshegi ushın juwapkershilik penen qatnas jasawǵa, búgini hám erteńgi kúni ushın jankúyer, pidayı bolıwǵa shaqırdı. Xalqınıń hám mámlekettiń mápleri jolında bel baylawǵa, oqıp izleniwine, rawajlanıwımızǵa úles qosıwına, joqarı sheklerdi iyelewine isenim bildirildi.
Sáwbetlesiw dawamında sárkarda úlgili xızmeti, komandirler tárepinen qoyılǵan wazıypalardı orınlawdaǵı juwapkershiligi, elimizdiń eń alıs Arqa-Batıs aymaqların qorǵawda joqarı jawıngerlik tayarlıǵı ushın áskerlerge óziniń minnetdarshılıǵın bildirdi.
Áskeriy bólimlerde alıp barılǵan jawıngerlik hám ruwxıy-aǵartıwshılıq tayarlıq sabaqlarında, sonday-aq, sport hám mádeniy ilajlarda belsene qatnasqanı ushın olarǵa áskeriy okrug atınan raxmet ayttı. Búgin Jańa Ózbekstandı qurıp atırǵan miynetkesh xalqımızǵa, Prezidentimizge iyinles bolıw, elimizdiń abadanlıǵı jolında xızmet etiw eń joqarı maqtanısh ekenin túsindirdi. Watanǵa antına sadıq qalıwǵa, bárqulla el táǵdiri ushın janıp jasaw kerekligin eskertti.
Saltanatlı ilaj dawamında 400 ge shamalas múddetli áskeriy xızmetkerlerge joqarı bilimlendiriw mákemelerine oqıwǵa kiriwde qosımsha ball beretuǵın áskeriy bólim sárkardalıǵınıń jeńilletilgen usınısnamaları tapsırıldı.
Ótken jılǵı kórsetkishte jámi 45 jigit armiya qatarlarında xızmetti dawam ettiriw tilegin bildirgen bolsa, bıyılǵı máwsimde múddetli áskeriy xızmetti ótew dáwirinde keleshektegi ómirin áskeriy xızmet penen tıǵız baylanıstırıp, keleshekte kontrakt boyınsha áskeriy xızmetti dawam ettiriw tilegin bildirgenler sanı 106 ǵa jetti. Bul nárse jaslar arasında áskeriy kásiptiń abırayı artıp atırǵanınan, maqtanıshlı tarawǵa qızıǵıwshılıq kóbeygeninen derek beredi.

Ilajǵa qatnasqan mámleketlik hám jámiyetlik shólkemlerdiń wákilleri armiya qatarların tárk etip atırǵan jaslar arqalı olardıń ata-analarına óz minnetdarshılıǵın bildirip, olardıń jarqın júz benen úyge qaytıwın tiledi. Keleshektegi ómirine aqıl-násiyat berip, jurt táǵdiri ushın pidayı bolıwǵa shaqırdı.
Nókis garnizonı áskeriy orkestri hám Qaraqalpaqstan Respublikası Mádeniyat ministrliginiń kórkem óner ǵayratkerleri tárepinen kórsetilgen koncert baǵdarlaması bárshege kóterińki keypiyat baǵıshladı.
Bunnan soń jaslar Qorǵanıw ministrliginiń buyırtpası tiykarında “Ózbekstan temir jolları” AJ tárepinen usınıs etilgen arnawlı áskeriy eshalonda áskeriy orkestr sazları astında úylerine jol aldı.

Qaraqalpaqstan xabar agentligi.