Prezident Shavkat Mirziyoev 7-mart kúni sanaat ushın áhmiyetli minerallar shiyki zat bazasın keńeytiw hám qosımsha qunlı ónimler islep shıǵarıw boyınsha prezentaciya menen tanıstı.

Elimiz aymaǵında volfram, molibden, magniy, litiy, germaniy, grafit, vanadiy hám titan sıyaqlı 30 dan aslam sanaat ushın áhmiyetli minerallar bar. Biraq aldın bul imkaniyat tolıq júzege shıǵarılmaǵan. Qazılmalardı izlew, texnogen shıǵındılardı qayta islep, paydalı elementlerdi ajıratıp alıw hám olardan ónim tayarlawǵa investiciya qirgizilmegen edi.
Sońǵı jılları shólkemlestiriw tiykarı jaratılıp, joqarı qosımsha qunlı ónimler alıw boyınsha jumıslar baslandı. Prezentaciyada taw-kán sanaatı hám geologiya ministri bul baǵdardaǵı imkaniyatlar haqqında málimleme berdi.
Aldaǵı 3 jılda 28 siyrek ushırasatuǵın mineral boyınsha 2,6 millard dollarlıq 76 joybardı ámelge asırıw mólsherlenbekte. Onıń ushın shiyki zat bazasın keńeytiw maqsetinde geologiyalıq-izlew ilimiy-izertlew jumıslarına qosımsha qarjı ajıratıw názerde tutılmaqta.
Eń tiykarǵı wazıypa-zamanagóy texnologiyalardı qollanıp, qımbat shiyki zattı rudadan ajıratıp alıw, sapasın arttırıw hám joqarı qunlı ónimler jaratıw ekenligi kórsetip ótildi. Mısalı, «Jińishke» kánindegi volfram koncentratı bayıtılsa, qosımsha qun 2 esege artadı. Házirshe usı sıyaqlı 18 joybar islep shıǵılǵan.
Tarawda «shiyki zat- qayta islew – ilim hám texnologiya –tayar ónim» shınjırın keńeytiw maqsetinde molibden menen volframǵa bay Tashkent hám Samarqand wálayatlarında texnoparkler shólkemlestiriw usınısı bildirildi.
Mámleketimiz basshısı bul baǵdarda sanaat tájiriybeleri hám texnologiya transferin ámelge asırıw, zamanagóy laboratoriya hám oqıw orayların ashıw boyınsha tapsırmalar berdi. Ulıwma, «tórtinshi sanaat revolyuciyası » dáwirinde múnásip orınǵa iye bolıw ushın bekkem tiykar jaratıw zárúrligi atap ótildi.

ÓzA