Ózbekstan Respublikası Prezidenti mámleketlik sapar menen Franciyaǵa baradı.

Ózbekstan Respublikası Prezidenti Shavkat Mirziyoev Franciya Respublikası Prezidenti Еmmanuel Makronnıń mirát etiwine bola 11-13-mart kúnleri mámleketlik sapar menen usı mámlekette boladı.
Sapar sheńberinde Parij qalasında joqarı dárejedegi sóylesiw hám ilajlar, Franciyanıń rásmiy hám isbilermen toparları menen bir qatar ushırasıwlar ótkeriliwi rejelestirilgen.
Bolajaq sóylesiwler kún tártibinen kóp tárepleme Ózbekstan-Franciya qatnasıqların jáne de rawajlandırıw hám bekkemlew máseleleri orın alǵan.
Sawda-ekolnomikalıq hám investiciyalıq tarawlarda óz-ara paydalı birge islesiwdi keńeytiw, Franciyanıń jetekshi kompaniya hám kárxanaları menen kooperaciya joybarların alǵa qoyıwǵa tiykarǵı itibar qaratıladı.
Sammit juwmaǵında húkimetleraralıq hám uyımlararalıq kelisimler toplamın qabıl etiw názerde tutılǵan.
Bunnan tısqarı, mámleketimiz basshısı YuNESKO Bas direktorı Odri Azule menen ushırasıp, shólkem Bas konferenciyasınıń 43-sessiyasına tayarlıq kóriw hám onı bıyılǵı jıldıń gúz máwsiminde Samarqand qalasında ótkeriwdiń ámeliy jaqların dodalaydı.
Bolajaq sapar qarsańında kóplegen ilajlar ótkerilip atırǵanın atap ótiw zárúr.
Atap aytqanda, 1-mart kúni Gretc-Armenvil qalasındaǵı «Uranoskop» observatoriyası aymaǵında ullı ilimpaz Ábiw Rayxan Beruniydiń esteligi ashıldı.
Usı kúnlerde Parij qalasında densawlıqtı saqlaw, ilim hám bilimlendiriw, mádeniyat, turizm hám biznes tarawlarında forum hám ánjumanlar ótkerilmekte. Tuluza, Lion hám Niccada birgeliktegi isbilermenlik ilajları bolıp ótedi.

ÓzA