Qaraqalpaq xalqınıń alamoynaq duwtarınıń janǵa jaǵımlı hawazı ózgeshe. Oǵan qosılıp, qulaqtıń qurıshın qandırıp, jaqsı keypiyat baǵıshlaytuǵın xosh hawaz iyeleri hár qashanda xalıqtıń alǵısına miyasar bolıp kelgen. Dástanlar hám xalıq qosıqların atqarıp xalqımızǵa belgili bolǵan baqsılardıń jolın dawam etip kiyatırǵan jaslardı kórip, kórkem ónerimizdiń keleshegine jáne de isenimimiz artadı.
Gúljamal Berkinbaeva baqsıshılıq ónerine kishkeneliginen qızıǵıp, ózi tuwılıp ósken Kegeyli rayonındaǵı 11-sanlı balalar muzıka hám kórkem óner mektebine qatnay baslaydı. On tórt jasında saz ónerinen tálim alıp baslaǵan qız, bul jerde ustazı Berdiyar Seytmuratovtan ala moynaq duwtardı shertiwdi hám qosıq aytıwdı úyrene baslaydı. Qısqa waqıttıń ishinde duwtar shertip, qosıq aytıwdı úyrengen Gúljamal tańlawlarda qatnasıp, sıylı orınlardı iyelewge miyasar boladı. Atap aytqanda, Kegeyli rayonında bolıp ótken «Dástan atqarıw sheberligi» tańlawında birinshi orındı, Aqtuba awılı jasları arasında bolıp ótken «Baqsı hám jırawlar» tańlawında ekinshi, «Zulfiya izbasarları» tańlawınıń rayonlıq basqıshında úshinshi, «Bes baslama olimpiadası» tańlawınıń máhálle jasları arasında ótkerilgen basqıshında birinshi hám sol tańlawdıń rayonlıq basqıshında da birinshi orındı iyelewge miyasar boladı. Álbette, bul jetiskenlikler on tórt jasında anasınıń baslaması menen muzıka mektebine barıp, saz ónerin úyrengen kishkene qız ushın úlken tabıs boldı.
Guljamal 2023-jılı muzıka mektebin tamamlap, Ózbekstan mámleketlik kórkem óner hám mádeniyat institutınıń Nókis filialınıń baqsıshılıq hám dástanshılıq qánigeligine oqıwǵa tapsırıp, mámleketlik grant tiykarında oqıwǵa qabıllanadı. Elimizge belgili ustazlar, kórkem óner ǵayratkerleri miynet etip atırǵan dárgayda oǵan Zulfiya atındaǵı mámleketlik sıylıqtıń laureatı, belgili baqsı Lola Maxammaddinova ustazlıq etip kelmekte. Ol oqıwlarınan jaqsı bahalarǵa úlgeriw hám baqsıshılıq óneri menen shuǵıllanıwı menen birge ilimiy jumıslar menen de shuǵıllanıp kelmekte. Jazǵan ilimiy maqalaları menen Ǵárezsiz mámleketlediń doslıq awqamı sheńberinde 2023-jılı 11-fevral kúni Tashkent qalasında bolıp ótken xalıqaralıq ilimiy-ámeliy tańlawda qatnasıp «Eń jaqsı xızmetleri ushın» kókirek belgisi menen sıylıqlandı.
Usı jıldıń 14-yanvar kúni Prezidentimizdiń elimiz jasları menen sáwbetlesiwinde qatnasqan jaslar qatarında Gúljamal Berkinbaeva da bar edi.
-Prezidentimiz benen ushırasıwda qatnasqanımnan oǵada quwanıshlıman. Ushırasıw dawamında Prezidentimizdiń biz jaslarǵa degen itbarın kórip júdá tolqınlandım. Ushırasıwda jaslar ushın úlken imkaniyatlar esiklerin ashıp, keleshegimizge isenimimizdi jáne de arttırdı. Bul hár bir jastıń keleshekke qaray isenimli qádemler taslap, jaratılǵan imkaniyatlardan durıs paydalanıp, oqıp bilim alıp, óner úyrenip, el-xalqımızǵa xızmet etiwi ushın úlken túrtki boldı dep oylayman. Men de keleshekte baqsıshılıq tarawın jetik meńgerip, kóplegen jetiskenliklerdi qolǵa kirgizip, Zulfiya atındaǵı mámleketlik sıylıqtıń iyesi bolıp, xalqımızdıń maqtanısh etetuǵınday qızı bolıp jetisiwdi aldıma maqset etip qoyǵanman,-deydi ol.
Guljamal bıyıl oqıw dárgayınıń 3-kursında bilim almaqta. Hár kúni ustazınıń bergen tálimi arqasında qolındaǵı alamoynaq duwtarı menen qaraqalpaq xalıq dástanların hám jańa qosıqlar atqarıwdı úyrenip atırǵan qızdıń keleshekke degen isenimi mol. «Niyetiń joldasıń» degenindey jaqsı niyetleri ómirine joldas bolǵan baqsı qızdıń tabısları aydın keleshegi menen ulasqay.

Gúlnara Turdıshova, Qaraqalpaqstan xabar agentligi