Prezident Shavkat Mirziyoev 3-mart kúni awıl xojalıǵı tarawında xalıqaralıq birge islesiwdi rawajlandırıwǵa baylanıslı prezentaciya menen tanıstı.

Elimiz agrosanaatı nátiyjelilik hám bazar qatnasıqları jaǵınan reformalanbaqta. Tarawǵa aldınǵı agrotexnologiyalar, ilim jetiskenlikleri keńnen engizilmekte.
Bir topar qánigeler jaqında Qıtay, Italiya, Yaponiyaǵa barıp, ilimiy institutlar, iri kompaniya hám xojalıqlardıń tájiriybesin úyrendi. Usı tiykarda jańa birge islesiw rejeleri islep shıǵıldı.
Bizge belgili, joqarı ónimdarlıqtıń birinshi faktorı bul tuqım jetistiriw. Qıtay awıl xojalıǵı ilimleri akademiyası eginlerdiń tuqımın hám nál jetistiriwde úlken tájiriybege iye. Elimizde bolsa awıl xojalıǵı boyınsha 14 ilimiy institut, 55 tuqım jetistiriw xojalıǵı bolıwına qaramastan jańa sort hám agrotexnologiya máselesinde kemshilikler bar. Diyqanlar jergilikli tuqımnan payda kórmegeni ushın sırt eldikin ekpekte.
Sonlıqtan Joqarı Shırshıq rayonındaǵı Agroxızmetler orayında Qıtay tájiriybesi tiykarında tuqımgershilik hám nálshilikti jolǵa qoyıw rejelestirilmekte. Onıń ushın 200 million dollar investiciya kirgizilip paxta, biyday, salı, mákke, júzim hám miywe sortları kóbeytiledi. Tuqım alıwdan baslap, onı zamanagóy texnika hám dronlar járdeminde egiw, dárilew, jıynaw hám qayta islew boyınsha úlgili aymaq shólkemlestiriledi.
Taraw ushın jáne bir áhmiyetli másele – maman kadrlar. Bul baǵdarda Italiyada jaqsı bilimlendiriw sisteması bar. Tek ǵana Bolonya universiteti Evropanı maman qánigeler menen támiyinlewde úlken orın iyeleydi. Ilimiy institutlar jeke menshik sektor menen birge islesiw ornatıp, buyırtpa tiykarında sapalı sortlardı jaratıp, kommerciyalastırmaqta.
Bul tájiriybelerdi úyreniw maqsetinde Italiyadaǵı Bolonya, Tushia, Ferrara, Piza joqarı oqıw orınlarına bıyıl 200 jastı jiberiw názerde tutılmaqta. Sonday-aq, Tushia universiteti jılına 30 azıq-awqat texnologin grant tiykarında oqıtıw, elimizde kadrlar tayarlawdı jolǵa qoyıw usınısın bildirgen.
Dúnya tájiriybesin úyreniwde oqıp, islew baǵdarlamaları da qolaylı keledi. Máselen, Tashkent agrar universitetiniń Samarqand filialı, Xalıqaralıq awıl xojalıǵı universiteti ótken jılı bir topar studentlerdi Germaniya hám Angliyaǵa jibergen. Tashkent mámleketlik agrar hám Xalıqaralıq awıl xojalıǵı universitetleri, Ferǵana azıq-awqat texnologiyası hám injenerligi xalıqaralıq universitetinde studentlerdi Yaponiyaǵa jiberiw ushın yapon tili orayları shólkemlestirilmekte.
Prezentaciyada rejeler qollap-quwatlanıp, bunday birge islesiwdi Vengriya, Niderlandiya, Kanada, Avstraliya, Qubla Koreya sıyaqlı agrosanaat rawajlanǵan mámleketler menen de keńeytiw zárúr ekenligi atap ótildi. Awıl xojalıǵı ministrligine aymaqlarda innovaciyalıq joybarlardı kóbeytiw boyınsha baǵdarlama islep shıǵıw tapsırıldı.

ÓzA