Ózbekstan Respublikası Prezidentiniń 2025-jıldıń 4-fevraldaǵı «Joqarı oqıw orınları pitkeriwshileriniń jumısqa ornalasıwına járdemlesiw boyınsha qosımsha ilajlar haqqında»ǵı qararı tiykarında, Qaraqalpaqstan Respublikası Prokuraturasınıń baslaması menen Berdaq atındaǵı Qaraqalpaq mámleketlik universitetinde miynet yarmarkası bolıp ótti.

Ilajda Berdaq atındaǵı Qaraqalpaq mámleketlik universitetiniń oqıw isleri boyınsha prorektorı O.Duysenbaev Qaraqalpaqstan Respublikası Prokuraturasınıń bólim baslıǵı A.Erkunusov, Respublika Prokurorınıń aǵa járdemshisi N.Allabergenova shıǵıp sóylep, Prezidentimizdiń basshılıǵında elimizde oqıw orınlarınıń pitkeriwshilerdiń bántligin támiyinlew hám olardıń miynet bazarında múnásip orın iyelewi boyınsha ámelge asırılıp atırǵan ilajlarǵa toqtap ótti.
-Ótkerilip atırǵan bul ilaj pitkeriwshilerdiń keleshektegi kásiplik jumısların jolǵa qoyıwda úlken áhmiyetke iye bolıp, universitet hám jumıs beriwshiler arasında bekkem birge islesiwdi ornatıwǵa xızmet etedi,-deydi Berdaq atındaǵı Qaraqalpaq mámleketlik universitetiniń oqıw isleri boyınsha prorektorı O.Duysenbaev.
Yarmarkaǵa mámleketlik shólkemler, iri kárxanalar hám jeke menshik sektor wákilleri qatnasıp, ózlerinde bar bolǵan bos jumıs orınları haqqında maǵlıwmat berip, studentler hám pitkeriwshiler menen óz-ara sáwbetlesti.

Adilbay Orazov,
Qaraqalpaqstan xabar agentliginiń sholıwshısı.