Prezident Shavkat Mirziyoev 24-fevral kúni bajıxana jumısın jetilistiriw hám sanlastırıwǵa baylanıslı prezentaciya menen tanıstı.

Regionallıq hám xalıqaralıq ekonomikalıq baylanıslardı jaqsılaw maqsetinde bul tarawda kóp jumıslar islendi. Onǵa shamalas mámleketler menen aldın ala málimleme almasıwı jolǵa qoyıldı, bajıxana rásmiylestiriwi hám maǵlıwmatlardı qayta islew orayları shólkemlestirildi. 4 iri bajıxana postında terminallar qurıldı, 20 dan aslamı jańa úskeneler menen támiyinlendi. Isbilermenler ushın 35 málimleme sisteması engizilip, eksport processleri 9 basqıshtan 3 basqıshqa tústi.
Usılardıń nátiyjesinde shegara arqalı transportlar háreketi 8 esege kóbeyip, derlik 5 milionǵa shekem jetti. Byudjetke túsimler 9 esege ósip, ótken jılı 63 trillion sumnan astı. Júklerdi rásmiylestiriw waqtı importta 3 saatqa, eksportta 20 minutqa shekem qısqardı.
Ulıwma, sistemanıń jeńilletiliwi arqalı 6 mıńǵa shamalas eksportyor jáne 20 mıńǵa shamadas importyordıń qárejeti hám waqtı únemlengen. Xalıqaralıq logistika reytinginde bajıxana kórsetkishi boyınsha Ózbekstan 140-orınnan 74-orınǵa kóterilgen.
Biraq ele sanlastırıw, processti jedellestiriw hám qolaylastırıw boyınsha wazıypalar kóp. Prezentaciyada bul baǵdardaǵı ilajlar kórip shıǵıldı.
Sońǵı jıllarda bajıxana aymaǵında qayta islew túrleri keńeytilgeni nátiyjesinde usınday tárizde eksport etilgen tovarlardıń úlesi ótken jılı 1 milliard dollardan asqan. Bul sistemanı bunnan bılay da jetilistirip, usı jıldıń ózinde eksporttı 1,5 milliard dollarǵa jetkeriw múmkin.
Qońsılas mámleketler menen sawda hám turizm baylanısları keńeyip atırǵanı sebepli shegaradaǵı jolawshılar hám avtotransport aǵımı keminde 2 esege artıwı kútilmekte. Bul qosımsha infrastruktura jaratıp, postlarda ótkeriwsheńlikti arttırıwdı talap etedi.
Sonıń ishinde, xalıqaralıq qatnawlardı kóbeytiw maqsetinde avtobuslarda da aviareyslerdegidey, jolawshılar haqqındaǵı maǵlıwmatlardı aldınnan alıw sisteması názerde tutılmaqta. Nátiyjede avtobuslar shegaradan ápiwayılastırǵan tártipte ótkerilip, rásmiylestiriw waqtı 2 esege qısqaradı. Sonday-aq, eń iri bajıxana postlarında jeńil avtomobil hám avtobuslar ushın qızıl hám jasıl koridorlar engiziw usınıs etilmekte.
Bajıxana baqlawında jasalma intellektti keńnen qollanıw máselesine ayrıqsha itibar qaratıldı. Usı maqsette Jáhán banki qánigeleriniń járdeminde «qáwip sisteması» jetilistiriledi. Bul sistema qarjı turaqlılıǵı, sawda tariyxı sıyaqlı 122 norma boyınsha isbilermenlerdiń isenimlilik dárejesin bahalaydı. Sonday-aq, rentgen kórinisleri jasalma intellekt tiykarında talqılanıp, qáwipli tovarlar avtomat túrde anıqlanadı.
Mámleketimiz basshısı bul usınıslardı maqullap, tarawda xalqımız ushın jeńillikler jaratıw, isbilermenler hám turistlerge operativ xızmet kórsetiw zárúrligi atap ótildi. Jáhán sawda shólkemine aǵza bolıw procesinde bajıxana nızamshılıǵın buǵan tolıq muwapıqlastırıw wazıypası qoyıldı.
Bajıxana institutı potencialın arttırıw, jaslama intellekt, sanlı texnologiyalar, qáwip-qáter boyınsha qánigeli kadrlar tayarlaw, dual bilimlendiriwdi keńeytip, ámeliyattı jaqsılaw zárúrligi atap ótildi.

ÓzA