Respublikalıq Balalar kitapxanasında barlıq rayon(qala)lıq Mektepke shekemgi hám mektep bilimlendiriwi bólimine qaraslı mektep kitapxanashılarınıń kásiplik mamanlıǵın arttırıw, olardıń bilim dárejesin rawajlandırıw hám bekkemlew maqsetinde, «Mektep kitapxanası xújjetlerin júrgiziw tártibi» atamasında seminar-trening shólkemlestirildi.

Seminar-treningti Respublikalıq Balalar kitapxanası direktorı Z.Seytniyazova, direktordıń shólkemlestiriw isleri boyınsha orınbasarı Z.Rambergenovalar shıǵıp sóylep, ilajdı ótkeriwdiń maqseti hám wazıypaları, kitapxana jumıslarınıń jetiskenlikleri boyınsha keń túrde aytıp ótti.
Seminarda «Ulıwma orta bilim beriw mektebi kitapxanashısınıń lawazımlıq wazıypaları» atamasında slayd prezentaciyası menen kitapxananıń metodikalıq bólim baslıǵı A.Tleumuratova shıǵıp sóylep, Ózbekstan Respublikası Mektepke shekemgi hám mektep bilimlendiriwi ministrliginiń 2024-jıl 16-oktyabrdegi 334-sanlı buyrıǵınıń 43-qosımshasında belgilengen kitapxana baslıǵınıń lawazımlıq minnetleri xaqqında aytıp, seminar qatnasıwshılarına keń túrde túsinikler berdi.
Bunnan soń «Mektep kitapxanalarında kitap oqıwshıǵa xızmet kórsetiw hám xújjetler menen islesiw tártibi» atamasında slayd prezentaciyası menen kitap oqıwshılarına xızmet kórsetiw bólimi baslıǵı I.Ametova, «Bibliografiyalıq xabarlardı usınıwdıń tiykarǵı formaları hám kitap kórgizbe, kitap prezentaciyalardı jaratıw usılları» atamasında slayd prezentaciyası menen Málimleme-bibliografiya sektor baslıǵı A.Nurıllaeva, «Mektep kitapxanalarında jańa texnologiyalardan paydalanıw usılları» boyınsha slayd prezentaciyası menen málimleme resursları hám texnologiya bólim baslıǵı K.Ibraymovlar jaqınnan tanıstırıp ótti.
Kitapxananıń Mádeniy massalıq ilajlar bólimi baslıǵı A. Amanǵalieva bolsa, kitap oqıwshıların kitapxanaǵa tartıw, olardı kitapqumarlıqqa qızıqtırıwdıń jańa usılları boyınsha «Kitaplar bándirgisi» atamasında interaktiv hám viktorinalıq oyınlar shólkemlestirip, onı ótkeriwdiń tártibi boyınsha óz másláhátlerin berdi.
Seminar-trening hám ámeliy jumıslar menen dawam etti. Atap aytqanda, Respublikalıq Balalar kitapxanasınıń kitaplardı jámlew hám kataloglastırıw bólimi tárepinen qatnasıwshılarǵa mektep kitapxanasına jańadan kelgen ádebiyatlardı dizimge alıw hám ádebiyatlardı texnikalıq jaqtan qayta islew jumısları ámeliy usılda kórsetildi hám kitapxanashılar ózleri menen alıp kelgen kitaptı texnikalıq jaqtan qayta islep úyrendi.
Sonday-aq, kitap oqıwshılarǵa xızmet kórsetiw bólimi tárepinen kitapxanaǵa oqıwshılardı aǵza etiw, dizimge alıw, kúndelik toltırıw tártibi boyınsha ámeliy jumıslar ótkerildi. Kitapxanashılar ózleri ámelde kitapxanada júrgiziletuǵın xújjetlerdi toltırıw tártiplerin ámelde kórsetip, olardıń kásiplik mamanlıq tájiriybesi, bilim dárejeleri arttırılıp barıldı. Kitapxana xızmetkerleri tárepinen tayarlanǵan metodikalıq qollanbalar, metodikalıq usınıslar, mektep kitapxanaların bezew hám kitap fondların toltırıw boyınsha standartlar, normativlik hújjetler toplamları hám basqa da kerekli maǵlıwmatlar berildi.
Seminar-trening sońında kitapxanashılar menen óz-ara pikir alısıp, ózlerin qızıqtırǵan sorawlarǵa juwaplar aldı.

Adilbay Orazov,
Qaraqalpaqstan xabar agentligi sholıwshısı