Ózbekstan Respublikası Prezidenti Shavkat Mirziyoev hám Rossiya Federaciyası Prezidenti Vladimir Putin 21-fevral kúni bolıp ótken telefon arqalı sóylesiwde Ózbekstan menen Rossiya arasındaǵı keń kólemli strategiyalıq sheriklik hám awqamlaslıq qatnasıqların jáne de rawajlandırıw hám bekkemlewdiń áhmiyetli máselelerin dodaladı.

Rossiya Prezidentiniń ótken jılı may ayındaǵı Ózbekstanǵa mámleketlik saparı dawamında erisilgen kelisimlerdi jetekshiler tárepinen tastıyıqlanǵan «jol kartası»na muwapıq ámelge asırıw nátiyjeleri kórip shıǵıldı.
Túrli dárejelerde jedel dawam etip atırǵan nátiyjeli sóylesiw hám almasıwlar joqarı bahalandı. Sawda-ekonomikalıq hám investiciyalıq birge islesiwdegi tiykarǵı kórsetkishlerdiń ósiw pátin támiyinlew, sonday-aq, eki mámleket aymaqlarında sanaat kooperaciyası joybarların qollap-quwatlawǵa ayrıqsha itibar qaratıldı.
Gumanitarlıq birge islesiw, bárinen burın, mádeniyat, kórkem óner, ilim, bilimlendiriw, sonıń ishinde injener kadrlardı tayarlaw, densawlıqtı saqlaw hám sport tarawlarında keńeyip baratırǵanı úlken qanaatlanıwshılıq penen atap ótildi.
Ózbekstan hám Rossiya jetekshileri xalıqaralıq kún tártibindegi máseleler boyınsha da pikir alısıp, bolajaq ilajlar rejesin dodaladı.

ÓzA